1 Juan 3 - Inkeanon

Bilang Mga Unga it Dyos Ayaw kamo Magpatentar nga Magpakasaea

¹ Grabi gid-a it bahoe ro paghigugma it Dyos nga Ama katon! Dahil sa kabahoe ku anang paghigugma ngaron hay ginbilang nana kita nga anang mga unga, ag matuod gid ma't-a nga mga unga kita it Dyos. Pero ro mga tawo riya sa kalibutan hay owa gakilaea katon bilang mga unga it Dyos, tungod owa man nanda ginakilan-a ro Dyos.

² Mga pinalangga, mga unga eon kita it Dyos, pero owa pa makaron ginpahayag ro tanan kon mauno kita sa ulihi. Sayod kita nga kon magbalik si Kristo hay mangin pareho kita kana, ay hikita naton kon mauno gid imaw.

³ Ngani ro tanan nga nagapaabot gid nga matabo ra hay nagapangabuhi it malimpyo sa mata it Dyos, pareho kay Kristo nga owa gid it bisan ano nga saea.

⁴ Ro nagapadayon sa pagpakasaea hay nagabaliwala sa *Kasuguan it Dyos dahil ro pagpakasaea hay pagbaliwala sa Kasuguan it Dyos.

⁵ Pero hasayran eon ninyo nga nag-adto riya si Kristo agod bue-on ro kasae-anan it mga tawo, ag imaw mismo hay owa gid it saea.

⁶ Ngani ro nagapadayon sa anang maeueot nga kaangtanan kay Kristo hay owa eon nagapadayon sa pagpakasaea. Pero ro nagapakasaea gihapon hay owa pa't-a nakaeubot ku kinaiya ni Kristo, o nakakilaea man kon sin-o gid imaw.

⁷ Akon nga mga unga sa pagtuo, ayaw kamo magpadaea-daea. Ro nagahimo it mayad hay matarong pareho kay Kristo.

⁸ Pero ro nagapadayon sa pagpakasaea hay unga ni Satanas, dahil ro pagpakasaea hay hilimuon eo't-a ni Satanas halin pa't-a kato. Mawron nga nag-adto riya sa kalibutan ro Unga it Dyos agod samaron ro mga ginahimo ni Satanas.

⁹ Ngani owa eon nagapadayon sa pagpakasaea ro tawo kon matuod imaw nga unga it Dyos, tungod una kana ro kinaiya it Dyos. Ro Dyos eon ro anang ama ngani owa eon imaw nagapadayon sa pagpakasaea.

¹⁰ Ngani makilaea gid naton kon sin-o ro unga it Dyos ag kon sin-o ro unga ni Satanas paagi dikara: ro owa nagahimo it matarong ag ro owa nagahigugma sa anang igmanghod sa pagtuo hay bukon it unga it Dyos.

Maghigugmaanan Kita

¹¹ Mga unga kita it Dyos ngani dapat kita hay maghigugmaanan, dahil raya ro mensahi nga inyong habatian halin pa ku pag-umpisa ninyo it pagtuo.

¹² Indi naton pagtuearon si Cain nga nagpagahom kay Satanas, ro ginahalinan it kaeainan, tag anang ginpatay nga owa't kueukaeuoy ro anang igmanghod nga si Abel. Ham-an it ginpatay nana? Tungod ro ana mismong mga buhat hay maeain, ag ana nga ginakaugtan ro matarong nga buhat ku anang igmanghod nga si Abel.

¹³ Ngani, mga igmanghod, ayaw kamo mangawa nga ginakaugtan man kamo ku mga tawo nga owa nagatuo sa Dyos.

¹⁴ Tungod ginahigugma naton ro atong igmanghod sa pagtuo hay nakasiguro kita nga bukon eon kita it matsa mga patay nga owa nahakat parti sa Dyos, kundi gintaw-an kita it Dyos it bag-o nga kabuhi. Pero ro owa nagahigugma sa anang igmanghod hay matsa patay gihapon, nga owa nahakat parti sa Dyos.

¹⁵ Ro nagakaugot sa anang igmanghod hay pareho it manogpatay, ag sayod naton nga ro manogpatay hay owa gid it bag-o nga kabuhi nga owa it katapusan.

¹⁶ Naintindihan naton kon ano ro kahueugan it gugma tungod hakita naton nga ginhaead ni Kristo ro anang kabuhi por dahil katon. Ngani dapat man naton nga ihaead ro atong kabuhi sa pagserbi sa atong mga igmanghod sa pagtuo, bisan ikamatay pa naton.

¹⁷ Halimbawa abi nga may sangka tawo nga bugana sa tanan nga pagkabutang iya sa kalibutan ag hakita nana nga ro anang igmanghod sa pagtuo hay ginakueang, pero owa man nana ginakaeuy-i ag ginabuligi. Paalin naton mahambae nga anang ginapakita ro gugma nga halin sa Dyos?

¹⁸ Mga unga nakon sa pagtuo, ipakita naton ro atong matuod nga paghigugma sa atong mga igmanghod paagi sa paghimo kanda it mayad. Ayaw eang kamo maghinambae nga ginahigugma ninyo sanda, kundi ipakita man sa buhat.

¹⁹ Paagi karon hay masayran man naton nga nagasunod kita sa matuod nga mensahi, ag malimpyo ro atong konsensya kon magpangamuyo kita sa Dyos.

²⁰ Kon amat abi hay ginakonsensya kita nga magpangamuyo sa Dyos tungod nakatagumpaaw kita nga kueang ro atong paghigugma sa atong isigkatawo. Pero tandaan naton nga ro Dyos nga nakasayod ku tanan-tanan hay mas masaligan kaysa sa atong konsensya, ag kaeuy-an nana kita.

²¹ Ngani mga pinalangga, kon malimpyo ro atong konsensya hay makapangamuyo kita sa Dyos nga may kaisog it buot.

²² Ag bisan ano ro aton nga ginapangayo kana hay aton nga mabaton, tungod ginatuman naton ro anang kasuguan ag ginahimo naton ro makapalipay kana.

²³ Daya ro pinakapunto ku mga sugo it Dyos katon: dapat nga magtuo gid kita sa anang unga nga si Jesu-Kristo, ro dungganon nga Maneueuwas, ag dapat kita nga maghigugmaanan pareho ku sugo katon ni Jesu-Kristo.

²⁴ Ro tanan nga nagatuman sa kasuguan it Dyos hay may padayon nga maeueot nga kaangtanan kana, ag ro Dyos hay padayon nga maeueot kana. Makasiguro kita kara tungod gintao nana katon ro Espirito Santo.