1 Juan 1 - Inkeanon

Ro Nagatao it Kabuhi nga Owa't Katapusan

¹ Sa raya nga sueat hay amon nga ginasugid kinyo ro parti kay Jesus nga ginatawag nga Mensahi, nga nagatao it kabuhi nga owa it katapusan. Imaw hay una eo't-a bago pa gintuga ro bisan ano. Nagpakatawo imaw ag nag-istar iya sa kalibutan. Amon imaw nga nabatian maghambae, amon imaw nga hakita mismo ku amon nga mga mata ag hapamusturahan, ag habuytan ku amon nga mga alima.

² Imaw nga nagatao it kabuhi hay nag-adto gid iya sa kalibutan ngani mapamatud-an namon nga hakita gid namon imaw, ag ginasugid namon kinyo nga imaw ro ginatawag nga Kabuhi nga Owa it Katapusan. Bago imaw nag-adto iya hay kaibahan eo't-a imaw it Dyos nga Ama, ag ku ulihi hay nag-abot gid-a ngani imaw iya.

³ Ngani ginasugid namon kinyo kon ano ro among hakita ag habatian parti kay Jesu-Kristo, agod kamo hay makaiba man kamon sa amon nga pagpakig-iba sa Dyos nga Ama, ag sa anang Unga nga si Jesu-Kristo.

⁴ Ginasueatan man namon kamo kara agod mangin tueos ro aton nga kalipay.

Ro Tumueuo hay Indi Dapat Magpakasaea

⁵ Rondaya ro mensahi nga among habatian halin kay Jesu-Kristo ag daya man ro amon nga ginasugid kinyo: ro Dyos hay pareho it kahayag ag owa gid it bisan ano nga kadueom ukon kasae-anan kana.

⁶ Ngani kon ginahambae naton nga may aton nga pagpakig-iba sa Dyos pero nagapakasaea pa gihapon kita hay nagapinuril kita, tungod makita sa atong buhat nga owa naton ginatumana ro matuod nga mensahi. Ag kon makaruyon hay matsa nagakabuhi man gihapon kita sa kadueom.

⁷ Pero kon kita hay nagakabuhi sa kahayag, kapareho ku Dyos nga una sa kahayag hay may atong mayad nga pag-ililiba sa atong mga kaigmanghuran, ag ro pag-uea ku dugo ni Jesus kat gineansang imaw sa krus ro nagalimpyo sa tanan-tanan naton nga mga saea.

⁸ Kon maghambae kita nga owa kita it saea hay ginaluko eang naton ro atong kaugalingon, tungod owa gid nakatanom sa atong paino-ino ro kamatuuran nga ginpahayag it Dyos parti sa saea.

⁹ Pero kon aton nga akuon sa Dyos ro atong mga saea, ag pangayuan it patawad hay ana kita nga patawaron ag limpyuhan sa tanan naton nga nahimo nga bukon it matarong, agod mangin limpyo kita sa anang panueok, dahil ro Dyos hay permi nga matarong ro anang ginaobra, ag permi nga masaligan nga tumanon nana ro anang ginpromisa.

¹⁰ Ngani kon maghambae kita nga owa gid-a kita nagakasaea hay ginaobra naton nga purilon ro Dyos, ag gapakilaea ron nga owa gid nakatanom sa atong paino-ino ro hambae it Dyos parti sa saea.