1 Corinto 8 - Inkeanon

Ro Hanungod sa Pagkaon nga Ginhaead sa mga Diyos-Diyos

¹ Kon parti ma't-a sa inyong pangutana parti sa karne nga ginhaead sa mga diyos-diyos hay raya ro akong mahambae. Matuod ro inyong hambae nga “sayod kita tanan nga ro mga diyos-diyos hay mga bagay man lang nga owa it kabuhi,” ugaling ro atong hasayran hay makahimo katon nga matinaas-taason, pero kon ginahigugma naton ro atong mga igmanghod hay makapalig-on ron kanda sa andang pagtuo.

² Ro nagaeaom nga sayod eon nana ro tanan hay nagapakita nga may ana nga owa pa't-a hasayri.

³ Pero ro may paghigugma hay ruyon 't-a ro ginakilaea it Dyos nga may matuod nga hasayran.

⁴ Balikan naton ro inyong pangutana kon puydi kitang magkan-on it karne nga ginhaead sa mga diyos-diyos. Sayod kita nga ro mga diyos nga ginarepresentar kuno it mga diyos-diyos hay bukon it matuod dahil sambilog gid lang ro matuod nga Dyos ag owa eon it iba pa.

⁵ Bisan nagahambae ro mga tawo nga abo nga diyos idto sa eangit o iya sa kalibutan ag bisan nagasimba ro tawo sa kaabo nga ginatawag nanda nga mga diyos ag mga ginuo,

⁶ pero kita't-a hay sayod naton nga sambilog eang ro Dyos ag ruyon hay ro aton nga Ama. Imaw ro nagtuga it tanan-tanan ag ro tuyo nga gintuga kita hay agod magserbi ag magsimba kana. Ag sambilog eang man ro Ginuo ag si Jesu-Kristo ron. Paagi kana hay gintuga it Dyos ro tanan nga butang ag paagi man kana hay gintaw-an kita it atong bag-o nga kabuhi.

⁷ Pero may mga tumueuo nga owa gihapon nakasayod nga ro mga diyos nga ginarepresentar kuno it mga diyos-diyos hay bukon it matuod. Nagbahoe abi sanda nga nagapati sa mga diyos-diyos. Ngani hasta makaron kon makakaon sanda it ginhaead sa diyos-diyos, pageaom nanda hay nagasimba gihapon sanda dikaron. Ngani pamatyag eon nanda hay mahigko sanda sa panueok it Dyos ay ginakonsensya sanda dahil karon.

⁸ Bukon it kon ano ro atong ginakaon ro makapahamuot katon sa Dyos. Bisan ano ma't-a ro atong ginakaon hay indi ron makabuhin o makadugang sa pagkahamuot it Dyos katon.

⁹ Pero dapat nga maghaeong kamo dahil bisan libre kamo magkaon it bisan ano hay basi mangin dahilan ron nga magkasaea ro mga bukon pa it malig-on ro pagtuo.

¹⁰ Raya ro akong buot hambaeon. Sayod mo nga ro mga diyos nga ginarepresentar kuno it mga diyos-diyos hay bukon it matuod ngani owa it kaso kimo kon magkaon ka sa simbahan it diyos-diyos. Pero samtang nagakaon ka idto hay hakita ka it sangka tumueuo nga nagaisip gihapon nga saea magkaon it ratong pagkaon, ugaling dahil hakita ka nana idto hay nag-isog ra buot nga magtuead kimo nga magkaon man idto bisan ginakonsensya imaw parti karon.

¹¹ Hasayran mo nga owa ka ginabawaei it Dyos nga magkaon ku pagkaon ngaron ugaling dahil ginkaon mo ron hay nagtuead 't-a imaw kimo bisan makapakonsensya ron kana, ngani ginasamad mo ro anang pagtuo ag kon sigehon na nga baliwalaon ra konsensya hay impyerno ra dangaton sa ulihi. Igmanghod mo pa man don imaw sa pagtuo ag ginsakripisyo man ni Kristo ro anang kabuhi para kana.

¹² Kon magkasaea kamo sa inyong mga igmanghod sa pagtuo dahil kamo ro dahilan nga ginaobra nanda ro mga makapakonsensya kanda, nagakasaea man kamo kay Kristo.

¹³ Ngani kon dahil eang sa akong ginakaon hay magakasaea ro akong igmanghod sa pagtuo, indi eon lang ako magkaon-kaon it karne nga ginhaead bilang sakripisyo sa mga diyos-diyos bisan hasta hin-uno.