1 Corinto 7 - Inkeanon

Ro Turo ni Pablo Parti sa Pag-asawa

¹ Kon parti ma't-a sa mga bagay nga inyong ginsambit sa inyong sueat hay raya ro akong mahambae. Hambae ninyo nga mayad sa eaki kon indi imaw maghulid sa bayi.

² Pero dahil may mga nagahulid sa bukon nanda it asawa, ngani mas mayad nga mag-asawa sanda agod kada isaea hay may andang kahulid nga anda mismong asawa.

³ Kon parti sa paghulid it mag-asawa hay obligasyon ron nanda sa kada isaea ngani dapat ron nanda nga tumanon.

⁴ Sa mag-asawa, ro asawa nga bayi hay owa it kinamatarong nga ana nga idimot ro anang eawas sa anang asawa dahil may kinamatarong man karon ro anang asawa. Makaruyon man sa eaki, may kinamatarong man ro anang asawa sa anang eawas.

⁵ Ngani ayaw ninyo pagdimuti ro kada isaea nga indi't-a kamo maghulid. Ro oras eang nga ginasugtan ro mag-asawa nga indi anay maghulid hay kon nagkasugot ma't-a kamo nga magpangamuyo para sa sangka bagay nga importanti sa sueod it pilang adlaw. Pero dapat hay gakasugot man kamo kon man-o eang it buhay. Pero pagkataliwan eon karon hay puydi eo't-a nga maghulid kamo agod indi kamo matentar ni Satanas nga magpangawatan dahil indi ninyo mapugngan ro inyong kaugalingon.

⁶ Owa ko kamo ginasugua nga magpaiway sa paghulid agod may oras kamo sa pagpangamuyo. Obraha eang ninyo ron kon kinahangean ag nagakasugot ma't-a kamo.

⁷ Gahandom ako nga ro tanan hay pareho kakon nga may ikasarang nga magpangabuhi nga owa it asawa ugaling hay ikasarang ron halin sa Dyos ag bukon it tanan hay gintaw-an nana karon. Owa abi nagapaeareho ro gintao it Dyos nga ikasarang sa kada isaea.

⁸ Raya ro akon nga mahambae sa mga baeo nga eaki man o bayi inha kinyo. Mayad pa kon magpabilin lang sanda nga owa it asawa pareho kakon.

⁹ Pero kon indi sanda makapugong sa andang kaugalingon hay dapat nga mag-asawa sanda. Mas mayad pa nga mag-asawa lang sanda kon permi't-a sandang nagabinatyag it grabing kailigbon nga makahulid.

¹⁰ Kinyo inha nga may mga asawa eon, may akon nga sugo kinyo ag bukon eang ra it akon kundi ana ku Ginuo. Indi dapat makigbueag ro bayi sa anang asawa.

¹¹ Pero kon halimbawa nga may bayi inha nga makigbueag sa anang asawa hay indi imaw dapat mag-asawa it iba. Pero kon gusto nana nga mag-asawa it uman hay dapat nga magbalik imaw sa anang dating asawa. Ag sa mga eaki inha kinyo hay indi man dapat sanda makigbueag sa andang asawa.

^12-13 Sa mga mag-asawa ma't-a inha nga ro sambilog hay tumueuo ag ro sambilog hay bukon, raya ro akong bilin kinyo. Bisan owa it ginhambae ro Ginuo parti dikara, raya ro akong bilin bilang apostol. Kon ro asawa nga bukon it tumueuo hay nagasugot ma't-a nga mag-iba gihapon sanda, ro asawa nga tumueuo hay indi dapat makigbueag sa ana ngarong asawa.

¹⁴ Ginahambae ko ra dahil ro asawa nga bukon it tumueuo hay ginpaeain para sa Dyos dahil sa anang kaangtanan sa anang asawa nga tumueuo. Kon bukon it matuod ron hay pagabilangon nga mahigko ro inyong mga unga sa panueok it Dyos. Pero bukon 't-a it makaruyon. Sanda man hay ginpaeain para sa Dyos dahil sa ginikanan nga tumueuo.

¹⁵ Pero kon gusto ku bukon it tumueuo nga magbueag sa anang asawa nga tumueuo hay sugti imaw. Ro tumueuo nga asawa hay owa nakagapos nga magpabilin sa andang pag-iliba ngaron kon ro asawa't-a nga bukon it tumueuo ro gustong makigbueag. Pero kon puydi man lang hay mas mayad nga indi sanda magbueag kundi magpabilin sanda nga mag-iba nga may mayad nga pagsinaeayo dahil gintawag kita it Dyos nga magkabuhi it matawhay. Owa it kinahangean nga hawiran ku tumueuo nga asawa ro anang asawa dahil gintawag kamo it Dyos nga magkabuhi nga may paghidait.

¹⁶ Posible't-a abi nga paagi kinyo nga asawa nga nagatuo hay basi magtuo man ag maeuwas ro bukon pa it tumueuo ninyo nga asawa.

Dapat nga Kontento Kita ag Magpangabuhi nga Nagatao it Kalipay sa Dyos

¹⁷ Raya ro akong ginabasehan ku akong ginahinambae. Ginbutang it Ginuong Dyos ro kada isaea katon sa atong kahimtangan sa pagpangabuhi ngani kon ano ro sangka tawo tag gintawag imaw it Dyos nga magtuo kay Kristo hay dapat nga makuntento eon imaw dikaron. Isentro dapat nana ro anang paino-ino sa pagkabuhi nga makapahamuot sa Dyos. Ruyon ro akong ginabilin sa tanan nga grupo it mga tumueuo.

¹⁸ Halimbawa, kon Judio ka nga hatuli eon bago ka gintawag it Dyos nga magtuo kay Kristo hay ayaw eon pag-ideyahi kon paalin maduea ron. Kon owa ka hatuli ay bukon ka it Judio bago ka gintawag nga magtuo hay indi ka eon dapat magpatuli.

¹⁹ Bukon it importanti kon hatuli ka o owa, ro importanti hay nagatuman ka sa mga sugo it Dyos.

²⁰ Ngani ginahambae ko it uman nga kon ano ro sangka tawo tag gintawag imaw it Dyos nga magtuo hay dapat nga makuntento eon imaw dikaron. Dapat nana isentro ro anang paino-ino sa pagkabuhi nga makapahamuot sa Dyos.

²¹ Kon ulipon ka tag gintawag ka nga magtuo ka hay owa it kaso. Pero kon may kahigayunan ka nga makahilway hay himusli ron.

²² Ulipon ka man o bukon hay owa it kaso ay bisan ulipon ka tag gintawag ka it Dyos agod may imong maeueot nga kaangtanan sa Ginuo hay ginhilway ka eon nana sa imong mga saea. Ag ro bukon it ulipon kat gintawag imaw it Dyos hay nangin ulipon eon ni Kristo.

²³ May ginbayad ro Dyos agod mangin ana kamo nga katawhan ngani ayaw kamo magpaulipon sa tawo.

²⁴ Mga igmanghod, kon ano ro sangka tawo tag gintawag imaw it Dyos nga magtuo hay dapat nga makuntento eon imaw dikaron. Dapat nana isentro ro anang paino-ino sa pagkabuhi nga makapahamuot sa Dyos.

Ro mga Owa it Asawa hay Mas Hilway sa Pagserbi sa Ginuo

²⁵ Kon parti ma't-a sa mga owa't asawa, owa ako it ikasugo kanda nga halin sa Ginuo. Pero raya ro akong ikahambae kanda bilang sangka tawo nga sa kabuot it Dyos hay nangin masaligan.

²⁶ Kon kakon hay mayad nga indi mag-asawa ro mga owa pa it asawa dahil malisod ro panyempo makaron.

²⁷ Pero kon may asawa ka hay ayaw pagbueagi ro imong asawa. Kon owa ka pa it asawa hay ayaw it usoy it asawa.

²⁸ Pero kon mag-asawa ka hay bukon ron it saea. Ag kon ro sangka bayi nga owa pa it asawa hay mag-asawa, owa imaw gakasaea dahil karon. Ugaling dahil sa kalisod ku panyempo makaron hay may dugang pa nga kalisod nga hiagyan ro mga mag-asawa ag gusto ku kunta nga ilikaw kamo dikaron.

²⁹ Mga igmanghod, dapat ninyo nga maeubtan ro akon ngarang ihambae. Sangkiri lang ro habilin naton nga tyempo. Ngani umpisa makaron, ro mga eaki nga may asawa hay indi dapat nanda pag-obrahon nga sabeag ro andang asawa mawron nga indi sanda kaserbi it mayad sa Dyos.

³⁰ Imaw man kon nasubo kita o nalipay man, indi naton pagpabay-an ro atong kasubo o kalipay nga mangin sabeag sa atong pagserbi sa Dyos it todo-todo. Ag ro atong isip hay bukon man dapat it idto lang sa mga bagay nga atong ginabinakae dahil ro pagserbi sa Dyos hay mas importanti kaysa sa mga pagkabutang.

³¹ Matuod nga magamit naton ro mga bagay iya sa kalibutan nga para sa atong kamaeayran ugaling dapat nga bukon it dikaron nasentro ro atong isip dahil maabot ro oras nga ro bilog nga sistema it atong pagpangabuhi makaron iya sa kalibutan hay maduea.

³² Gusto ko nga owa kamo it ginapalitikan. Ro mga tumueuo nga eaki nga owa it asawa hay makasentro ku andang isip sa pagtuman ku kabubut-on it Ginuo ag kon paalin nanda imaw mataw-an it kalipay.

³³ Pero ro eaki nga may asawa hay nagaisip pa't-a ku anang mga responsibilidad sa anang pamilya ag kon paano nana mataw-an it kalipay ro anang asawa.

³⁴ Ngani indi imaw makasentro sa anang pagserbi sa Ginuo ay may ana pang ginaisip nga pamilya. Ro tumueuo nga bayi nga owa eon it asawa ag ro bayi nga owa pa it asawa hay makasentro ku andang isip sa pagtuman ku kabubut-on it Ginuo ay gusto nanda nga balaan sanda sa tanan nandang ginaisip ag ginaobra. Pero ro bayi nga may asawa hay nagaisip pa't-a ku anang mga responsibilidad sa anang pamilya ag kon paalin nana mataw-an it kalipay ro anang asawa.

³⁵ Para sa inyong kamaeayran ro akong ginahambae ngara. Owa ako gabawae nga mag-asawa kamo. Ginabilinan ko kamo kara agod ro inyong pagserbi sa Ginuo hay tama ag husto ag owa it nagasabeag.

³⁶ Halimbawa abi nga may sangka eaki inha kinyo nga kaeasaeon ag gusto nana nga padaynan nga pakaslan ro anang nobya pero ginahambaean imaw it iba nga saea ron. Ugaling ginaisip man nana nga bukon it tama ro anang ginaobra sa anang nobya kon indi nana pagtumanon ro anang promisa kana. Ag kon nalisdan imaw magpugong sa anang baeatyagon sa anang nobya hay magpakasae lang sanda. Bukon ron it saea.

³⁷ Pero kon ro eaki hay nagdesidir nga kon kana hay tama nga indi lang imaw mag-asawa sa anang nobya, ag ana gid-a ron nga desisyon ag owa it nagpilit karon kana hay mayad kon indi lang nana pagpadaynan ro ana ngatong nobya.

³⁸ Ngani pareho nga mayad ro desisyon nga pakaslan ukon indi ro anang nobya pero mas bintaha ro desisyon nga indi lang nana pagpadaynan ro anang nobya.

³⁹ Ro bayi nga tumueuo nga may asawa hay nakahigot pa sa anang asawa myentras buhi pa ra. Pero kon patay eon hay hilway eon imaw nga mag-asawa it uman sa kon sin-o nga nailaan nana pero dapat nga nagatuo man ro eaki sa Ginuo.

⁴⁰ Pero kon kakon hay mas gamalipayon imaw kon magpabilin lang imaw nga owa eon it asawa. Ruyon ro akong opinyon ag kon kakon hay ginagiyahan man ako it Espirito Santo karon.