1 Corinto 6 - Inkeanon

Ro mga Tumueuo hay Indi Dapat Magkilihahan

¹ Ham-an it kon may akusasyon kamo kuntra sa inyong isigkapareho nga tumueuo hay owa't-a kamo nahuya nga magpahusgar sa mga owa nagatuo sa Dyos imbis nga magpahusay lang sa inyong isigkaparehong katawhan it Dyos?

² Owa baea kamo kasayod nga ro mga katawhan it Dyos ro magahusgar sa bilog nga kalibutan sa ulihi? Kon ro bilog nga kalibutan ngani ro inyong pagahusgahan, indi baea ninyo masarangan husayon ro mga maintok nga reklamo?

³ Bisan pa ngani ro mga anghel hay aton nga pagahusgahan sa ulihi. Ngani mas kapin pa nga masarangan naton nga husgahan ro mga bagay nga iya sa kalibutan.

⁴ Ngani kon may mga inogkaso kamo parti sa mga bagay iya sa kalibutan, ham-an it idto't-a kamo nagapahusgar sa mga huwis nga owa nagakilaea sa Dyos ag owa ginasaligi it mga tumueuo nga maghusgar suno sa kabubut-on it Dyos?

⁵ Owa kamo karon nahuya? Ham-an, owa eon gid baea it bisan sambilog eang nga maaeam sa inyong mga igmanghod sa pagtuo nga makahusay karon ay?

⁶ Pero haron, nagakilihahan 't-a kamo mismo nga magmaeanghod sa pagtuo ag bukon pa it mga tumueuo ro mga huwis!

⁷ Bisan magdaog pa kamo sa kaso hay perdi gihapon kamo sa panueok it Dyos ay ginkiha ninyo ro inyong isigkatumueuo. Mas mayad pa sa anang panueok kon pabay-an lang ninyo nga hiobrahan it saea o lukhon kaysa sa magkiha kamo.

⁸ Ugaling hay kamo pa mismo ro nagahimo it saea ag nagapangluko ag ro inyo pa nga kaigmanghuran sa pagtuo ro inyong ginahimuan karon!

⁹ Owa baea kamo kasayod nga ro mga nagahimo it bukon it matarong hay indi matapoe sa mga katawhan it Dyos nga anang sinakpan? Ayaw kamo it padaya ay pati man ro mga nagahulid sa bukon nanda it asawa, ro mga nagasimba sa diyos-diyos, ro mga nagapangawatan, ag ro nagahulid sa andang kaparehong eaki,

¹⁰ ro mga manakaw, ro mga maakop, ro mga paeahilong, ro mga manogpakaeain, ag ro mga nagapangeugos ku pagkabutang it iba hay indi man matapoe sa mga katawhan it Dyos nga anang sinakpan.

¹¹ Makaruyon man anay kato ro iba kinyo. Pero paagi sa ginhimo ni Ginuong Jesu-Kristo ag paagi sa gahom ku Espirito it atong Dyos hay ginlimpyuhan eon kamo sa inyong mga saea, ginpaeain it Dyos nga mangin ana nga balaan nga katawhan, ag ginbilang nga matarong sa anang panueok.

Bukon it Tama nga ro mga Tumueuo hay Maghulid sa Bukon Nanda it Asawa

¹² May nagahambae inha kinyo nga pagusto't-a mana ako kon ano ro akong obrahon. Pero ro akong sabat karon hay daya: bukon it tanan nga bagay hay para sa atong kamaeayran. Bisan ro sangka bagay hay bukon it bawae, indi ko gihapon ron pag-obrahon kon mangin ulipon man lang ako karon.

¹³ May gahambae man nga kon nagutom kita hay bukon it saea nga magkaon dahil ro aton nga tiyan hay para sa pagkaon ag ro pagkaon hay para sa tiyan. Tama ron, pero sa ulihi, obrahon eon it Dyos nga owa eon it dapat ro tiyan o pagkaon. Pero bukon it tama nga ro atong eawas hay para sa paghulid bisan kanyo kundi para't-a ron sa Ginuo ag ro atong eawas hay mahaega gid kana.

¹⁴ Ag ro atong eawas hay banhawon it Dyos sa ulihi paagi sa anang gahom pareho man sa anang pagbanhaw kay Ginuong Jesus.

¹⁵ Owa baea kamo kasayod nga ro inyong eawas hay parti man it eawas ni Kristo? Kita nga ginabilang nga mga parti it eawas ni Kristo hay indi gid dapat maghulid sa sangka bayi nga nagabaligya ku anang eawas ay mangin parti eon dayon ku eawas it bayi ngaron ro atong eawas!

¹⁶ Owa man baea kamo kasayod nga ro nagahulid sa makaruyon nga bayi hay mangin sangka eawas eon dayon ku ruyon nga bayi? Matuod ron ay nasueat ron sa Sagrado nga Kasueatan nga, “ro daywa hay mangin sambilog lang”

¹⁷ Pero ro may kaangtanan sa Ginuo hay sangka kabubut-on nana.

¹⁸ Ngani tapnaa eagi ninyo sa inyong paino-ino kon ginatentar kamo nga maghulid sa bukon ninyo it asawa. Ruyong saea hay eain sa ibang saea dahil ro nagahulid sa bukon nanda it asawa hay nagakasaea sa anda mismong eawas nga para't-a sa Ginuo ag parti it anang eawas.

¹⁹ Owa baea kamo kasayod nga ro inyong eawas hay templo nga ginaistaran it Espirito Santo nga gintao kinyo it Dyos? Bukon it inyo ro inyong eawas ngaron kundi ana't-a ron it Dyos

²⁰ ay may ginbayad ro Dyos sa pagtubos katon. Ngani gamita ro inyong eawas para sa kadungganan it Dyos.