1 Corinto 5 - Inkeanon

Mga Bilin Hanungod sa Pagkaimoral it Isaea sa mga Tumueuo sa TagaCorinto

¹ Bantog eon nga isaea sa inyong mga kaibahan sa inyong grupo it mga tumueuo hay nagahimo it imoral. Anang ginakabuhi ro ana mismong madrasta. Ro makaruyon nga klasi it pagkaimoral hay owa ngani ginasugti ku bisan mga owa nagakilaea sa Dyos.

² Pero bisan makaruyon ro gakatabo hay ginapabugae pa't-a ngani ninyo ron! Dapat 't-a kunta hay magkasubo kamo sa nagakatabo ngaron. Dapat nga pahalinon ninyo sa inyong grupo ro nagahimo karon.

^3-4 Bisan owa ako matuod inha hay matsa inha man ako ay inha ro akong buot kinyo. Kon kakon ma't-a, paagi sa otoridad nga gintugyan kakon ku atong Ginuo nga si Jesus hay akon eon nga hasintinsyahan ro nagahimo karon nga matsa inha man ako. Ngani dapat nga magtililipon ro tanan nga myembro it inyong grupo. Kaibahan man ninyo ako ay inha ro akong buot kinyo pati man ro gahom ku atong Ginuong Jesus.

⁵ Pahalina dayon ninyo ro tawo ngaron sa inyong grupo ag iintrigar imaw kay Satanas agod masamad ro anang eawas agod maeuwas ro anang espirito sa adlaw nga hukman eon it Ginuo ro katawhan.

⁶ Bukon 't-a it manami nga ginapabugae ninyo ro saea ngaron! Owa baea kamo kasayod ku haeambaeunon nga ro bisan sangkiri eang nga pangpaalsa hay makapaalsa sa bilog nga minasa nga harina?

⁷ Ngani bue-a ninyo ronduyon nga pareho it pangpaalsa nga una sa inyong grupo agod mangin balaan kamo nga grupo it mga tumueuo nga pareho it bag-o nga minasa nga harina nga owa it pangpaalsa. Ag sa panueok it Dyos hay ana gid kamo nga balaan nga katawhan dahil ginsakripisyo si Kristo para sa aton nga mga saea pareho it tiyo it karnero nga ginamatansa kon magselebrar it Pagtililipon sa Pagdumdum ku *Pagtaliwan.

⁸ Ngani padayunon naton ro selebrasyon sa pagdumdum ku anang kamatayon para sa atong mga saea. Aywanan eon naton ro saea ag kaeainan nga pareho it pangpaalsa ag bayluhan naton it kabuhi nga putli ag nagasunod sa kamatuuran.

⁹ Ginsueatan ko kamo kato nga indi kamo makig-iba sa mga tawo nga nagahulid sa bukon nanda it asawa.

¹⁰ Pero ro akong ginapatungdan hay bukon it ro mga owa nagatuo sa Dyos nga nagahulid sa bukon nanda it asawa, o ro mga maakop, o ro mga nagapangeugos ku pagkabutang it iba, o ro mga nagasimba sa mga diyos-diyos. Indi ron naton sanda malikawan ay kon galikaw kita kanda hay mahalin lang dapat kita sa raya nga kalibutan!

¹¹ Ro akon 't-a nga ginapatungdan nga indi ninyo dapat pag-ibahan hay ro mga nagaako nga igmanghod sa pagtuo pero nagapanghulid sa bukon nanda it asawa, o maakop, o nagasimba sa diyos-diyos, o manogpakaeain, o paeahilong o nagapangeugos ku pagkabutang it iba. Ayaw kamo it pakig-iba sa mga makaruyon bisan sa pagkaon

^12-13 Bukon it akong responsibilidad ro magsintinsya sa bukon naton it kaparehong tumueuo. Ro Dyos 't-a karon ro bahala kanda. Pero may atong responsibilidad nga magsintinsya sa atong kagrupo nga mga tumueuo nga nagapadayon sa pagpakasaea. Ngani dapat nga pahalinon ninyo sa inyong grupo ro nagahimo ngaron it maeain.