1 Corinto 4 - Inkeanon

Ginpaathag ni Pablo ro Kamatuuran Parti sa Pagserbi Nanda Bilang mga Apostoles

¹ Ro pagkabig dapat it tawo kamon hay mga sueuguon ni Kristo nga gintugyanan it Dyos ku mga kamatuuran nga anang ginlipod anay kato pero ginpahayag eon makaron.

² Kon parti ma't-a sa gintugyanan, sayod naton nga dapat gid nga masaligan sanda.

³ Kon kakon hay owa ako nahakat kon husgaran ninyo o bisan nanyo pa sa akong pagserbi sa Dyos. Bisan ako hay owa ngani nagahusgar sa akong kaugalingon.

⁴ Malimpyo ro akong konsensya pero bukon ako it kwalipikado nga maghusgar karon. Ro Ginuo eang ro may matarong nga maghusgar kakon.

⁵ Ngani ayaw 't-a kamo magpanghusgar bisan kanyo ay ro Ginuo't-a ro gahusgar sa tawo kon magbalik eon imaw. Dikato nana ibuyagyag ro mga bagay nga bukon pa it hayag makaron ag ipasayod nana ro mga tinago nga mga motibo ku kada isaea. Ag dikato man dayawon it Dyos ro kada isaea suno sa andang binuhatan.

⁶ Mga igmanghod, para sa inyo nga kamaeayran, gin-gamit ko nga halimbawa si Apolos ag ako agod paagi kamon hay mag-antigo kamo nga indi mageapaw sa kon ano ro nasueat sa Sagrado nga Kasueatan. Dahil kon eumapaw kamo, ro matabo dayon hay mangin bugaeon kamo nga inyo't-a nga igpinabugae ro sangka manogturo ag pagsinika-sikaon ro isaea.

⁷ Matsa kon sin-o gid kamo a! May mga abilidad baea kamo nga owa naghalin sa Dyos ay? Hay ham-an it nagapabugae kamo nga matsa ro mga abilidad ngaron ninyo hay una eagi kinyo ag owa't-a gintao kinyo?

⁸ Mga pwerti kamo a! Eaom eo't-a ninyo hay una eon kinyo ro tanan ag manggaranon eo't-a kamo sa tanan nga abilidad nga ginatao ku Espirito Santo. Kon kinyo hay haeabawan eon ninyo kami ay nagahari eon kamo kaibahan ni Kristo sa anang ginharian. Mayad gid kunta kon nagahari eo't-a matuod kamo no, agod magahari man kami kaibahan ninyo!

⁹ Pero kon kakon hay matsa ginbutang it Dyos kaming mga apostoles sa punta it parada nga pareho it mga sintinsyado nga bitayon samtang nagatan-aw ro bilog nga banwa pati ro mga anghel.

¹⁰ Dahil sa among pagwali parti kay Kristo hay ginahambae kami nga mga kaumangon. Pero kon kinyo, kamo hay mga maaeam bilang mga sumueunod ni Kristo. Owa man kuno kami it ikasarang pero kamo't-a hay grabi ro ikasarang. Sininyo hay mga dungganon kamo pero kami't-a hay bukon.

¹¹ Hasta makaron hay ginagutom ag ginauhaw kami. Nagasuksuk it eapat ag owa it baeay nga dugalingon ag ginasakit kami it mga tawo.

¹² Nagapatueo kami it hueas agod may makaon. Ro mga nagapakaeain kamon hay ginapangamuyuan namon nga pakamaayuhon sanda it Dyos. Ginatiis namon ro mga paghingabot kamon.

¹³ Ginasamaran kami pero mayad gihapon ro among pagsabat sa nagapangsamad kamon. Hasta makaron hay basura ro pagtan-aw kamon ku mga tawo sa kalibutan ag makangingil-ad.

¹⁴ Owa ko ra ginasueatan kinyo agod mahuy-an kamo kundi agod bilinan kamo bilang akon nga mga pinalangga nga mga unga.

¹⁵ Bisan indi mahuyap ro nagabulig ag nagabantay kinyo sa inyong pagtuo kay Kristo hay sambilog eang ako nga inyong ama sa pagtuo. Nangin ama ninyo ako dahil nagtuo kamo kay Kristo Jesus tag ginsugid ko ro Mayad nga Balita kinyo.

¹⁶ Ngani dahil ama ninyo ako sa pagtuo, ginahinyo ko kamo nga tueara ninyo ako sa akong pamatasan.

¹⁷ Mawron ngani nga ginpaadto ko inha kinyo si Timoteo nga akong palangga ag masaligan nga unga sa pagtuo sa Ginuo. Ana kamo nga padumdumon kon mauno ro akong pagpangabuhi bilang tawo nga may maeueot nga kaangtanan kay Kristo Jesus. Ro mga sueundanan nga akong ginasunod sa akong pagpangabuhi hay duyon man ro akong ginaturo sa tanan nga grupo it tumueuo bisan siin.

¹⁸ Ro iba kinyo hay nagbahoe eon ro ueo ay eaom nanda hay indi eon ako magbisita inha kinyo.

¹⁹ Pero sa indi magbuhay hay maadto gid ako inha kinyo kon pagbuot ron it Dyos. Tan-awon ko gid abi kon una sa mga bugaeon ngaron ro gahom ku Espirito Santo o basi puro eang sanda wakae.

²⁰ Ro pamatuod abi nga natapoe sa paghari it Dyos ro sangka tawo hay bukon eang it sa anang pag-ako karon kundi makita nga ginbag-o ro anang kabuhi paagi sa gahom it Dyos.

²¹ Ano ro inyong gusto? Maadto ako inha agod pangisgan kamo ag disiplinahon o ipakita ko kinyo ro akong pagpalangga ag pagpasensya? Pili kamo!