1 Corinto 2 - Inkeanon

Ro Ginwali ni Pablo hay Owa Nabase sa Kaaeam it Tawo Kundi sa Gahom it Dyos

¹ Mga igmanghod, pag-adto nakon inha kinyo agod ipasayod ro mga bagay nga ginlipod anay kato it Dyos, ro akong paghambae hay bukon it pareho ku mga mayad nga manoghambae ag sa tan-aw it mga tawo iya sa kalibutan hay owa ako it kaaeam.

² Nagdesisyon abi ako nga ro pinakasentro ku akong ituro kinyo hay ro hinimuan ni Jesu-Kristo ag eabi gid ro anang kamatayon sa krus.

³ Kat inha pa ako kinyo hay maeuya gid ro akong buot ag nagapaeangurog sa kahadlok.

⁴ Sa akon nga paghambae ag pagwinali kinyo hay owa ako naggamit it madaeom ag makagaeanyak nga mga pamisaea suno sa kaaeam iya sa kalibutan kundi ro gahom ku Espirito Santo hay makita sa akong pagwali.

⁵ Pagbuot ron it Dyos agod ro inyong pagtuo kay Kristo hay resulta it anang gahom bukon it ana ku kaaeam it tawo iya sa kalibutan.

Ro Matuod nga Kaaeam Halin sa Dyos hay Eain Kaysa sa Kaaeam it Tawo

⁶ Pero ro mga malig-on eon ro pagtuo hay nagakilaea nga ro among ginaturo hay bukon it pinaumang kundi kaaeam nga halin 't-a sa Dyos. Eain ro kaaeam ngara kaysa sa ginatawag it tawo nga kaaeam ag sa kaaeam ku mga manogdumaea makarong tyempo nga ginabue-an man lang it poder.

⁷ Pero ro kaaeam ngara nga among ginahambae hay napatungod sa plano it Dyos parti sa kamatayon ni Kristo sa krus. Ginplano ron it Dyos bago pa gintuga ro kalibutan ag makaron pa eang nana ginpasayod. Ag ro resulta ku rayang plano hay ro atong pag-ambit sa anang pagkadaeayawon.

⁸ Owa it bisan sambilog sa mga manogdumaea iya sa kalibutan nga nakaeubot ku rayang plano it Dyos ay kon haeubtan ra nanda hay owa eon kunta nanda pagpaeansangan si Kristo nga daeayawon ag dungganon nga Ginuo.

⁹ Pareho sa nasueat sa Sagrado nga Kasueatan, “Owa pa hakita o habatii it tawo ag owa pa haabot ku andang paino-ino ro ginpahaom it Dyos sa mga nagahigugma kana.”

¹⁰ Pero ginpahayag 't-a ron it Dyos katon paagi sa anang Espirito bangod owa it nalipod sa Espirito it Dyos ay bisan ro madaeom nga ginapaino-ino it Dyos hay sayod nana.

¹¹ Bukon abi nga owa't ibang makasayod sa ginapaino-ino it tawo kundi imaw eang mismo? Makaruyon man ro Dyos. Ro ana eang nga Espirito ro makatungkad ku anang paino-ino.

¹² Kita nga mga tumueuo hay bukon eon it pareho sa mga tawo iya sa kalibutan kon magpaino-ino ay gintaw-an eon kita it Espirito ngara it Dyos agod maeubtan naton ro mga pagpakamaayo nga gintao katon it Dyos hay dahil sa anang sobrang kabuot.

¹³ Ngani ro among ginaturo hay owa nabase sa kaaeam it tawo kundi kon ano ro ginaturo kamon ku Espirito Santo. Ginaturo namon ro espirituhanon nga mga bagay paagi sa mga nagakabagay nga mga bisaea nga ginatao kamon ku Espirito Santo.

¹⁴ Pero ro tawo nga owa kana ro Espirito it Dyos hay indi magbaton ku mga kamatuuran nga ginaturo ku Espirito Santo. Pinaumang ron kon kana ag indi nana maeubtan bangod owa kana ro Espirito Santo nga gabukas ku anang paino-ino agod makaeubot imaw.

¹⁵ Pero ro tawo nga una kana ro Espirito Santo hay makaeubot ku tanan nga ginapahayag kara pero indi imaw maeubtan ku mga tawo nga owa kanda ro Espirito Santo.

¹⁶ Pareho sa nasueat sa Sagrado nga Kasueatan nga, “May makatungkad gid baea sa paino-ino it Ginuong Dyos? May makaturo gid baea kana?” Pero kita't-a hay ginabag-o ku Espirito Santo ro atong paino-ino agod mangin pareho ra ku ay Kristo.