1 Corinto 13 - Inkeanon

Ro tanan Natong Ginaobra hay Nabase Dapat sa Atong Gugma sa Atong Isigkatawo

¹ Bisan siguro taw-an ako it abilidad nga maghambae it sari-sari nga linggwahe it mga tawo ag ku mga anghel pero owa man lang ako it gugma sa akong isigkatawo hay owa man ron it pueos. Pareho eang ako it agong o pompyang nga basta eang ginapilinatik.

² Ag bisan siguro gintaw-an ako it abilidad nga magsugid ku mga ginapahayag kakon it Dyos nga gusto nanang ipaabot sa kadagayaan, ag bisan siguro sayod ko ro tanan nga mga kamatuuran nga owa ginpasayod it Dyos sa iba ag ro tanan nga puyding masayran it tawo parti sa Dyos, pero owa man lang ako it gugma sa iba hay owa man gihapon ako it pueos. Ag bisan siguro may akon nga malig-on nga pagtuo nga masugo ko ro bukid nga magsaylo sa ibang lugar, owa man gihapon ako it pueos kon owa ako it gugma sa iba.

³ Bisan siguro akon pa nga ipanueupod tanan nakong pagkabutang sa mga ginakueang, ag bisan siguro makapabugae pa ako nga itugyan ko ro akong eawas nga makaagi it grabing kalisod dahil sa akong pagwali, pero kon owa man lang ako it gugma sa iba hay owa man gihapon ako it ganaron karon.

⁴ Ro nagahigugma hay mapinasensyahon, mabuot, bukon it mahisa, bukon it bugaeon ag owa nagapadayaw-dayaw.

⁵ Ro nagahigugma hay owa nagabinastos ag owa nagapaeabi ku anang kaugalingon. Bukon man it madali maakig ag bukon it madinumtanon.

⁶ Owa nana ginakalipay ro buhat nga bukon it matarong kundi nagapangibabaw ro kamatuuran.

⁷ Ro may paghigugma sa iba hay nagapasensya sa tanan nga andang ginahimo nga makaueugot. Owa nagakaduea ro anang pagsalig kanda ag ginapaabot nana permi nga magbag-o sanda. Ro matuod nga nagahigugma hay owa nagakataka.

⁸ Owa gid it sitwasyon nga ro paghigugma sa isigkatawo hay saea. Ro abilidad sa pagsugid ku ginapahayag it Dyos nga gusto nanang ipaabot sa kadagayaan hay may katapusan, pati ro abilidad sa paghambae ku mga linggwahe nga gintao it Espirito Santo. Bisan pa ro pinasahi nga hasayran halin sa Dyos hay may katapusan.

⁹ Ro atong mga hasayran makaron hay kueang pa't-a. Ag bisan ginasugid naton ro mga ginapahayag it Dyos sa katawhan paagi katon hay bukon pa ron it kumpleto, dahil owa pa't-a nana ginpahayag ro tanan.

¹⁰ Pero kon mag-abot eon ro oras nga kompleto eon ro tanan, rayang mga abilidad hay maduea eon ay owa eon sanda ginakinahangeana.

¹¹ Tag unga pa ako, ro akong panghambae, paino-ino ag pangrason hay tag inunga gid. Pero makaron nga may buot eon ako hay gin-aywanan ko eon ro pag-inunga.

¹² Makaron ro atong pagkaeubot parti sa Dyos hay bukon pa gid it klaro pareho it pagtan-aw sa masaeom nga espiho. Ro kapareho kara hay pagtan-aw sa litrato eang it sangka tawo imbis nga ro tawo mismo ro atong kaatubang. Pero maabot gid ro adlaw nga makaatubang gid naton ro Dyos ag mangin maathag eon ro tanan. Kueang pa makaron ro akong pagkakilaea kana pero maabot gid ro adlaw nga hikilaea ko gid imaw it husto pareho man ku anang pagkakilaea kakon.

¹³ Pero sa makaron pa, may tatlong ka bagay nga nagapadayon. Ro hauna hay ro atong pagtuo ag pagsalig sa Dyos nga euwason nana kita sa pina it atong kasae-anan. Ro pangaywa hay ro atong kasiguruhan parti sa mayad nga kahimtangan nga atong mabaton idto sa eangit. Ag ro ikatatlo hay ro atong gugma sa kada isaea. Pero ro pinakaeabaw sa tatlo ngara hay ro gugma.