1 Corinto 11 - Inkeanon

Parti sa Pagtabon it Ueo ku mga Bayi Kon Gasimba

¹ Tueara ninyo ako pareho sa akong pagtuead kay Kristo.

² Ginadayaw ko kamo ay inyo ako nga ginadumdum permi ag inyo nga ginasunod ro akong mga sueundanan nga ginbilin ko kinyo.

³ Pero may una pa nga gusto ko nga maeubtan gid ninyo parti sa otoridad. Ro pinuno it eaki hay si Kristo, ro pinuno it bayi hay ro anang asawa ag ro pinuno ni Kristo hay ro Dyos.

⁴ Kon nagatilipon kamo sa pagsimba ag may eaki nga magpangamuyo o maghambae ku mensahi nga halin sa Dyos nga may tabon ro anang ueo hay nagapakahuya kay Kristo nga anang pinuno.

⁵ Pero kon may bayi ma't-a nga magpangamuyo o maghambae ku mensahi halin sa Dyos nga owa it tabon ro anang ueo hay nagapakahuya sa anang asawa dahil kon owa it tabon ro anang ueo hay makahueuya ron pareho it nagpakalbo imaw.

⁶ Ngani kon may bayi nga indi magtabon ku anang ueo hay di magpabueog lang imaw nga pareho it tag-od ku ana it eaki! Pero dahil makahueuya man sa bayi nga matag-od ro anang buhok pareho it eaki o magpakalbo, dapat nga may tabon lang gid ro anang ueo.

⁷ Ro rason nga dapat nga owa it tabon ro ueo it eaki kon magsimba hay dahil kana makita kon mauno ro Dyos ag gintaw-an imaw it Dyos it otoridad nga mangin eabaw sa tanan nga tinuga. Ro bayi ma't-a hay nagapakita ku otoridad ku eaki paagi sa anang pagtabon sa anang ueo

⁸ dahil owa pagtugaha ro eaki halin sa bayi kundi ro bayi't-a ro gintuga halin sa eaki.

⁹ Owa man pagtugaha ro eaki dahil sa bayi kundi gintuga't-a ro bayi agod mangin kaibahan it eaki.

¹⁰ Ngani dapat nga tabunan ku bayi ro anang ueo ay bisan ro mga anghel hay nagatan-aw kon nagapasakop imaw sa otoridad it eaki.

¹¹ Owa ako nagahambae nga ro haega it bayi hay minos kaysa sa ana ku eaki. Dahil kita nga may maeueot nga kaangtanan sa Ginuo, ro atong haega hay paeareho, bayi man o eaki, ag kinahangean naton ro kada isaea.

¹² Dumduma ninyo nga dahil bisan ro hauna nga bayi hay naghalin sa eaki ag ro kada eaki eo't-a dayon hay ginaunga it bayi. Pero ro tanan hay halin sa Dyos.

¹³ Timbang-timbanga abi ninyo: bagay baea nga magpangamuyo sa Dyos ro sangka bayi nga owa it tabon ro anang ueo kon nagatililipon kamo sa pagsimba?

¹⁴ Bukon baea nga kato-kato pa hay sayod it tawo nga kon mahaba ro buhok it eaki hay kahuy-anan ron nana?

¹⁵ Pero sa bayi ma't-a, ro mahaba nga buhok hay nagapagwapa kana ay gintao ron kana it Dyos nga pangtabon ku anang ueo.

¹⁶ Kon may una nga gustong makigbais sa akon ngarang ginhambae, ro akong sabat hay owa kami it ibang pagginawi kundi ruyon ag ruyon man ro ana ku iba pa nga mga grupo it katawhan it Dyos.

Ro Tama nga Paagi sa Pagselebrar ku Ihapon sa Pagdumdum ku Kamatayon ni Jesus

¹⁷ May akon pang ihambae kinyo pero bukon it sa pagdayaw kinyo dahil ro inyong pagtililipon agod magsimba sa Dyos hay owa gadaea it kamaeayran kundi kaeainan.

¹⁸ Ro hauna hay habatian ko nga kon nagatililipon kamo bilang sangka grupo it tumueuo hay nagagrupo-grupo't-a kamo ag nagakueuntrahan, ag matsa gapati ako nga matuod ron.

¹⁹ Indi man abi malikawan ro mga makaruyon pero may pueos ron ay dikaron masayran kon sin-o kinyo ro mga aprubado it Dyos.

²⁰ Sa inyong pagtililipon agod magkaon it ihapon sa pagdumdum ku kamatayon it Ginuo hay bukon it anang kamatayon ro inyong ginapaino-ino,

²¹ dahil ro iba kuno kinyo hay owa eon nagahueueatan agod magdueungan kamo sa pagkaon, kundi nagalinamon eo't-a ku andang baeon ag owa nagapanao sa andang mga kaibahan. Ngani bundat eon ag hilong sanda pero ro iba hay owa eo't-a it makaon o mainom.

²² Bukon abi it may mga baeay man kamo kon siin puydi kamo nga magkaon ag mag-inom? Ham-an it owa kamo it pagtaha sa inyong isigkapareho nga tumueuo nga mga katawhan it Dyos? Ham-an it inyo man nga ginapakahuy-an ro mga owa it ikasarang? Ano ro inyong ginapaabot? Dayawon ko baea kamo sa inyong ginaobra ngaron? Indi gid-a ron!

²³ Indi ko kamo madayaw ay raya ro ginturo kakon it Ginuo nga ginturo ko man kato kinyo: Ku gabii nga gintraidor si Ginuong Jesus, tag nagaihapon sanda ku anang mga sumueunod hay nagbuoe imaw it tinapay,

²⁴ ana ra nga ginpasaeamatan sa Dyos ag ginpihak-pihak. Naghambae dayon imaw, “Raya ro akong eawas nga isakripisyo para kinyo. Umpisa makaron, himua ninyo ra nga tradisyon bilang pagdumdum sa akong pagsakripisyo.”

²⁵ Pagkaihapon nanda hay nagbuoe man imaw it ilimnan nga may sueod nga bino ag ginpasaeamatan rato sa Dyos. Naghambae imaw, “Ro sueod ku rayang kopa hay nagasimbolo ku bag-o nga kasugtanan nga gintao it Dyos sa tawo, ag ro akon nga dugo nga magaagay hay gapalig-on ku kasugtanan ngara. Kada mag-inom kamo it bino sa inyong pagtililipon, sa pagdumdum ku akong kamatayon, dumduma ninyo ro akong dugo nga nag-agay.”

²⁶ Ginahambae ko ra agod padumdumon kamo nga kada kaon ninyo it tinapay ag kada inom ninyo ku ilimnon sa inyong mga pagtililipon sa pagdumdum ku kamatayon ni Jesus hay inyo't-a dapat nga ginapasayod ro kamatayon it Ginuo hasta sa anang pagbalik.

²⁷ Ngani ro bisan sin-o nga nagakaon ku tinapay ag nagainom ku ilimnon sa pagdumdum ku kamatayon it Ginuo, nga ro anang ginainobra hay bukon it bagay sa mga pagtililipon sa pagdumdum ngara hay pagapinahan ag ro pina kanda hay pareho sa pina ku rondatong mga nagpatay mismo sa Ginuo.

²⁸ Ngani dapat anay usisaon it kada isaea ro anang kaugalingon kon tama baea ro anang pagpahaega ku kahueugan ku kamatayon it Ginuo. Makaintra eang imaw sa pagdumdum ngaron kon tama ro anang pagpahaega ku kahueugan karon.

²⁹ Ro nagaintra abi sa pagdumdum ku kamatayon it Ginuo nga owa nagakilaea ku kahueugan ku pagsakripisyo nana ku anang eawas hay nagakangay it pina ku Dyos sa anang kaugalingon.

³⁰ Mawron nga abo kinyo ro masakiton ag maeuya ag ro iba ngani hay nagkaeamatay eon.

³¹ Pero kon ginausisa't-a naton ro atong kaugalingon hay indi kita karon kaagi.

³² Pero kon ginapinahan kita makaron it Ginuong Dyos hay ginadisiplina nana kita agod sa ulihi hay indi nana kita pagkondenahon nga pinahan hasta sa owa it katapusan kaibahan ku mga tawo iya sa kalibutan nga owa nagatuo kana.

³³ Ngani mga igmanghod, kon magtililipon kamo sa pagdumdum ku kamatayon ku Ginuo hay maghueueatan kamo.

³⁴ Kon may ginagutom hay magkaon eagi imaw sa anda bago mag-adto sa pagtililipon sa pagdumdum agod indi eon kamo makahimo it maeain ag pinahan it Dyos. Kon parti ma't-a sa iba pang mga bagay hay ayuson ko ugaling ron kon inha eon ako.