1 Corinto 10 - Inkeanon

Mga Leksyon nga Aton nga Matun-an sa mga Natabo sa mga Kalolo-lolohan ku mga Judio

¹ Mga igmanghod, gusto ko nga masayran ninyo ro nagkaeatabo kato sa mga kalolo-lolohan namong mga Judio. Tanan sanda hay ginbantayan ag gin-giyahan ku daeaura nga ginpaiba kanda it Dyos ag nakatabok sanda tanan sa ginpamaea it Dyos nga Dagat nga Puea nga owa it natabo kanda.

² Sa andang mga gin-agyan ngaron hay matsa ginbawtismuhan sanda tanan bilang mga sumueunod ni Moises.

³ Haagyan nanda tanan ro milagroso nga pagtinao kanda it Dyos it pagkaon.

⁴ Tanan man sanda hay nag-ininom ku tubi nga gintinao kanda it Dyos, pareho ku rato nga tubi nga ginpatubod nana halin sa bato. Ro bato ngato hay nagasimbolo kay Kristo nga nag-iniba kanda.

⁵ Pero bisan permi eon nanda nga haagyan ro mga pagpakamaayo ngato hay nagsukoe gihapon sanda kana ngani nga owa nalipay ro Dyos sa kaeabanan kanda. Mawron nga sa pagtaliwan it tyempo hay ginpinahan nana sanda it kamatayon sa sari-sari nga lugar it *disyerto nga andang ginlinibot-libotan.

⁶ Ro mga nagkaeatabo ngaron kato hay paandam katon agod indi kita magtuead sa andang maeain nga batasan nga bukon it kuntento sa kon ano ro ginatao it Dyos kanda.

⁷ Indi man dapat kamo magsimba sa diyos-diyos pareho ku ginhimo ku iba kanda. May nasueat abi sa Sagrado nga Kasueatan parti kara nga, “Nagkinaon ag nag-ininom ro mga tawo sa pagsimba sa anang diyos-diyos ag pagkatapos hay nagminaoy.”

⁸ Indi man kita maghulid sa bukon naton it asawa pareho ku ginhimo ku iba kanda. Ginpinahan sanda it Dyos dahil karon ag mga 23,000 kanda ro nagkaeamatay sa sang adlaw eang.

⁹ Indi man dapat naton pagtestingan ro pasensya ni Kristo kon man-o it haba pareho ku ginhimo ku iba kanda mawron nga nagkaeamatay sanda sa pangot it dalitan nga sawa.

¹⁰ Ayaw kamo it reklamo kuntra sa inyong mga manogdumaea pareho ku iba kanda mawron ngani nga ginpamatay sanda ku anghel nga ginpaadto it Dyos.

¹¹ Natabo kanda ro mga butang ngaron agod mangin ehemplo kon ano ro dangaton ku mga nagahimo it mga makaruyon. Ag ginsueat man ro andang mga ginhimo ngaron agod mangin paandam katon nga nagakabuhi sa rayang tyempo kon siin nagakatuman eon ro plano it Dyos kato-kato pa.

¹² Ngani ro nagapati nga malig-on eon ro anang pagtuo hay dapat nga mag-andam agod indi eon imaw matentar.

¹³ Ayaw kamo magpaeuya it buot ay ro inyong ginaagyan nga mga tentasyon hay bukon it eain sa ginaagyan it tanan nga tawo. Pero masaligan gid ro Dyos ag indi nana pagsugtan nga tentaron kamo nga indi ninyo masarangan nga sukean kundi maobra imaw it paagi agod masukean ninyo ron.

Indi gid Kita Dapat Magsimba sa Kon Ano Pa Mageuwas sa Dyos

¹⁴ Ngani, mga hinigugma, magpaeagiw kamo sa pagsimba sa mga diyos-diyos.

¹⁵ Mga maaeam kamo, ngani timbang-timbanga ninyo kon tama o bukon ro akon kinyong ginahambae.

¹⁶ Sa aton nga pagtililipon sa pagdumdum ku kamatayon ni Kristo sa krus, kon magpasaeamat kita sa Dyos sa atong ginainom ag kon aton man nga ginakaon ro ginpihak-pihak nga tinapay hay bukon baea it nagaambit kita ku mga pagpakamaayo nga halin sa dugo ag eawas ni Kristo nga anang ginsakripisyo para katon?

¹⁷ Tungod ro atong ginakaon hay halin sa duyong sambilog eang nga tinapay, nagakahueugan ron nga bisan abo kita hay matsa sambilog eang kita nga eawas ni Kristo.

¹⁸ Tan-awa lang ninyo ro mga Judio nga mga inapo ni *Israel. Kon nagailiba sanda sa pagkaon ku ginhaead sa Dyos sa altar, bukon abi it nagapakita ron nga nagailiba sanda sa pagsimba kana?

¹⁹ Ayaw kamo mag-isip nga ginahambae ko nga ro mga diyos nga ginarepresentar kuno it mga diyos-diyos hay matuod, ag may pueos ro paghaead it pagkaon kanda.

²⁰ Bukon it duyon, kundi ro akong gustong ipaeubot kinyo hay kon nagahaead it sakripisyo ro mga tawo sa mga diyos-diyos nga eaom nanda hay matuod ag makabulig kanda, ro anda't-a nga ginahaearan hay ro mga demonyo. Ag owa ako naila nga makig-iba kamo sa mga demonyo.

²¹ Indi puydi nga magsaeo kamo sa pag-inom ag pagkaon sa pagdumdum ku kamatayon it Ginuo ag magsaeo man kamo sa mga pakaon nga para sa mga demonyo.

²² Gusto baea naton nga paimunon ro Dyos? Mas makusog pa baea kita kaysa kana nga maperdi naton imaw?

²³ May nagahambae nga pagusto't-a mana kita kon ano ro atong obrahon basta nga owa ron ginbawae it Dyos. Matuod ron pero bukon it tanan hay para sa ikamayad ag ikalig-on it pagtuo ku atong isigkatumueuo.

²⁴ Isipon dapat naton permi ro kamaeayran it iba, bukon it ro aton.

²⁵ Kon gabakae kamo it karne sa tindahan hay ayaw eon kamo magpangutana kon ginhaead rato sa diyos-diyos. Bakea eang ninyo ag kan-on

²⁶ ay nasueat sa Sagrado nga Kasueatan nga “ro kalibutan ag ro tanan nga iya hay ana it Ginuong Dyos.”

²⁷ Kon kangayon kamo it sangka bukon it tumueuo nga magkaon sa anda ag gusto man ninyo, adto kamo ag kan-a ro bisan ano nga ginadat-on kinyo. Ayaw eon magpangutana kon ro pagkaon ngato hay ginhaead sa diyos-diyos o owa.

²⁸ Pero kon may idto nga maghambae kinyo nga ginhaead rato sa diyos-diyos hay ayaw eon karon it kaon por dahil sa naghambae ngato kinyo ay kon kana hay saea't-a nga magkaon kato.

²⁹ Matuod nga owa kamo ginakonsensyaha kon magkaon ku mga pagkaon idto ugaling ginakonsensya 't-a ro naghambae ngato kinyo. Basi may maghambae nga kon himuon ko mana ro sangka bagay nga kon kakon hay hilway 't-ang nga himuon ron, ham-an it husgaran ako nga nagkasaea dahil eang nga sa konsensya it iba hay saea ron?

³⁰ Ham-an it ginapakaeain 't-a ako dahil sa akong pagkaon it ginpasaeamatan ko sa Dyos?

³¹ Ro sabat hay raya: tungod sa atong pagkaon o pag-inom o bisan ano ro atong ginaobra hay dapat himuon don naton tanan agod mapadunggan ro Dyos.

³² Ayaw maghimo it bisan ano nga makabaeabag sa bisan kanyo, Judio man o bukon, nga magbaton ku mensahi parti kay Jesus o magtueod sa inyong isigkapareho nga katawhan it Dyos nga makahimo it makapakonsensya kanda.

³³ Makaruyon ro akong ginaobra. Nagatinguha ako nga makigbagay sa tanan nga mga tawo agod mamati sanda it mayad sa akong ginaturo. Bukon it ro akong kaugalingon nga kamaeayran ro akong ginaisip kundi ro ana ku iba agod maeuwas sanda.