Zanaw 9 - ALA KA KUMA

Lɔnniya be weleli kɛ tugu

¹ Lɔnniya y'a ka soo tutunan wolonwula lɛsɛ. A y'a ka soo lɔ.

² A ye begɛnw faga, ka duvɛn labɛn. A ye dumuni kɛyɔrɔ yɛrɛ labɛn ka ban.

³ A y'a ka baaradenmusow ci ka taga weleli kɛ, u be pɛrɛnna dugu sanfɛ yɔrɔw la ko:

⁴ «Kolɔnbaliw, aw ka na yan!» A ko hakilitanw ma:

⁵ «Aw ye na ne ka dumuni kɛ. Ne ye duvɛn min labɛn, aw k'o min.

⁶ Aw kana kɛ kolɔnbaliw ye, o la aw bena sii sɔrɔ. Aw ka hakilitigiyasira ta.»

Lɔnnikɛla ni yɛrɛboɲala

⁷ Mɔgɔ min be yɛrɛboɲala ladi, o tigi be dɔgɔya lase a yɛrɛ ma. Mɔgɔ min be mɔgɔjugu ladi, o tigi be nɛni le.

⁸ Kana yɛrɛboɲala ladi. N'o tɛ, a ben'i kɔniya. Lɔnnikɛla ladi, i koo bena diy'a ye.

⁹ I ka lɔnnikɛla kalan, dɔ bena fara a ka lɔnniya kan. Mɔgɔtilennin ladi, o bena dɔ fara a ka sɔrɔ kan.

¹⁰ Masaba ɲasiran le ye lɔnniya daminɛyɔrɔ ye. Ka Ala lɔn, o le ye hakilitigiya ye.

¹¹ Bari, ne barika la, i be saan caaman kɛ, i be sijan sɔrɔ.

¹² N'i kɛra hakilitigi ye, a tɔnɔ b'i yɛrɛ le fɛ. N'i kɛra yɛrɛboɲala ye, a bɔnɛ y'i kelen ta ye.

Nalomanya ka weleli

¹³ Nalomanya be i ko muso mankantigi. A te foyi faamu, a te foyi lɔn.

¹⁴ A be sigi a ka soo daa la. A sigira sigilan kan, dugu sanfɛ yɔrɔ la,

¹⁵ ka to ka tɛmɛbagaw wele. Minw be tilenna ka taga n'u ka sira ye.

¹⁶ A ko: «Kolɔnbaliw, aw ka na yan!» A ko hakilitanw ma:

¹⁷ «I ye jii min soɲa, o ka di dɛ! I be dogo ka dumuni min kɛ, o fana ka di dɛ!»

¹⁸ K'a sɔrɔ u m'a lɔn k'u be saya kɔrɔ, ko muso nin ka mɔgɔ weleninw be jigira lahara le.