Zanaw 8 - ALA KA KUMA

Lɔnniya ka weleli

¹ Lɔnniya le te weleli kɛra wa? Hakilitigiya kumakan le te bɔra wa?

² A be kuluw kan sirada la. A be sira kunbɛnyɔrɔw la.

³ A be dugu dondaw la, a be o yɔrɔ la, a be pɛrɛnna ko:

⁴ «Ne be aw adamadenw le welela. Ne kaan be aw mɔgɔw le ma.

⁵ Kolɔnbaliw ka cekuya dege. Nalomanw ka hakilitigiya ɲini.

⁶ Aw ka mɛnni kɛ, kuma nafaman be n fɛ k'a fɔ. Ne dalakuma ye kuma tilenninw ye.

⁷ Bari, ne daa be tiɲɛ le fɔ. Kumajugufɔ man di ne ye.

⁸ Kuma minw be bɔ ne daa la, o bɛɛ tilennin lo. Galon t'a la, juguman t'a la.

⁹ U gwɛnin lo hakilitigi fɛ. U tilennin lo kolɔnbaga fɛ.

¹⁰ Aw ka sɔn ne ka ladiliw ma ka tɛmɛ warigwɛ kan. Aw ka sɔn lɔnniya ma ka tɛmɛ sanu yɛrɛyɛrɛ kan.

¹¹ Bari, lɔnniya ka fisa ni kɔnɔkisɛ ye. I diyanafɛnw si te se ka suma n'a ye.

Lɔnniya b'a yɛrɛ yira

¹² «Ne lɔnniya taamaɲɔgɔn ye yɛrɛkɔlɔsi le ye. Ne ye hakilitigiya sɔrɔ.

¹³ Ka siran Masaba ɲa, o kɔrɔ ko i ka kojugu goya i yɛrɛ ye. Yɛrɛboɲa, yada, kojugu, dajugu, olu koo ka go ne ye.

¹⁴ Ladili ni jatiminɛ ye ne ta ye, hakilitigiya ni fanga ye ne ta ye.

¹⁵ Ne barika la, masaw b'u ka kuntigiya kɛ, ɲamɔgɔw be sariya tilenninw sigi ne le barika la.

¹⁶ Ne barika la, faamaw b'u ka fangatigiya kɛ, ni mɔgɔbabaw, ani kititigɛlaw.

¹⁷ Ne be n kanubagaw kanu. Minw be ne yɔrɔ ɲini, olu be ne ye.

¹⁸ Nafolo ni kunkɔrɔta be ne fɛ. Fɛnɲuman mɛntaw, ni sɔrɔ be ne fɛ.

¹⁹ Nafa min be ne la, o ka fisa ni sanu ye, haali sanu yɛrɛyɛrɛ. Tɔnɔ min be ne la, o ka fisa ni warigwɛ ɲanaman ye.

²⁰ Ne be tilenninyasira le kan, ne ka sira ye hɔrɔnyasira le ye.

²¹ Ne be n kanubagaw kɛ fɛntigiw ye. Ne b'u ka soo nafolo caya.

²² Ne kɛra Masaba ka fɛɛn dannin fɔlɔ ye. A ye ne dan a ka fɛɛn fɔlɔw ɲa.

²³ Ne be yen kabini fɔlɔfɔlɔ, ne be yen kabini dugukolo dantuma na.

²⁴ Ne tun be yen, o y'a sɔrɔ kɔgɔji ma kɛ fɔlɔ. Sanni jii bɔyɔrɔw ka sɔrɔ, ne tun be yen.

²⁵ Yanni kuluw ka bɔ, ne tun be yen. Sanni tintinw ka sɔrɔ, o y'a sɔrɔ ne wolola.

²⁶ Sanni Masaba ka dugukolo ni kongokɔnɔna dan, yanni a ka buguri dan, n tun be yen.

²⁷ A ye sankolo yɛrɛkɛ tuma min na, ne tun be yen. A ye kɔgɔji daan bɔ tuma min na, ne tun be yen.

²⁸ A ye sankabaw kuru ɲɔgɔn kan tuma min na, ne tun be yen. A y'a kɛ kɔgɔji tun be bɔra a bɔyɔrɔ la ni fanga ye tuma min na, ne tun be yen.

²⁹ A ye daan bɔ kɔgɔji ye tuma min na, janko jii kana tɛmɛ o kan, ne tun be yen. Dugukolo juu sigituma na fana, ne tun be yen.

³⁰ Ne tun b'a kɔrɔ baaraɲamɔgɔya la. Ne tun b'a diyanako kɛra loon o loon. Ne tun be tolon na a ɲakɔrɔ tuma bɛɛ,

³¹ ka to ka tolon kɛ a ka dugukolo kan. Ne be nisɔndiya adamadenw cɛma.

Mɔgɔ min dagamunin lo

³² «Sisan, ne deenw, aw ka mɛnni kɛ ne fɛ. Mɔgɔ min be ne ka fɔta bato, o tigi dagamunin lo.

³³ Aw ka ne ka ladili lamɛn ka kɛ hakilitigiw ye, aw kana ban a la.

³⁴ Mɔgɔ min be mɛnni kɛ ne fɛ, min be to ne ka daa la loon o loon, o tigi dagamunin lo.

³⁵ Bari, ni mɔgɔ min ye ne sɔrɔ, o tigi ye sii sɔrɔ, o tigilamɔgɔ fana koo be diya Masaba ye.

³⁶ Nga, ni mɔgɔ min filila ne ma, o tigi b'a yɛrɛ ta cɛnna le. Ne kɔniyabaga be saya le fɛ.»