Zanaw 7 - ALA KA KUMA

Lɔnniya be mɔgɔ tanga

¹ N deen, n ka kuma bato. N ka fɔtaw mara i kɔnɔ.

² Ne ka fɔtaw bato, i bena sii sɔrɔ. N ka kalan kɔlɔsi i ko i ɲadenw.

³ U don i ka kɛwali la. U mara i dusu la.

⁴ I ka lɔnniya kɛ i teri ye, i taamaɲɔgɔn ka kɛ hakilitigiya ye.

⁵ O bena i tanga kakalamuso ma. O bena i kisi lonanmuso dadiman ma.

Kakalamuso ka kunko

⁶ Ka ne to n ka soo fenɛtiri daa la, ne ye filɛli kɛ kɛnɛba kan.

⁷ Kanbelen kolɔnbaliw cɛma, ne ye kanbelennin hakilitan dɔ kɔlɔsi.

⁸ A tun be tɛmɛna kakalamuso dɔ ka soo gɛrɛfɛ. Kanbelen y'a ka sosira ta.

⁹ Tilekun tun donna, suu tun kora, dibi tun be yen.

¹⁰ Muso nin y'a kunbɛn. A tun y'a yɛrɛ masiri i ko kakalamuso namaratɔ!

¹¹ A wɛrɛwɛrɛnin tun lo, a malo ka dɔgɔ. A juu te sigi a ka soo.

¹² Dɔɔni a be bɔlɔn na, dɔɔni a be forobayɔrɔ la. A be dɛn nɔnkɔnw na yɔrɔ bɛɛ.

¹³ A ye kanbelen nin minɛ k'a bolo meleke a la. A ma maloya k'a fɔ kanbelen ye ko:

¹⁴ «Ne tun ka kan ka jɛnɲɔgɔnya saraka bɔ. Ne y'o dajuru nin sara bii.

¹⁵ O le y'a to ne bɔra k'i kunbɛn. Ne tun b'a fɛ k'i ye, n do y'i kunbɛn.

¹⁶ Ne ye n ka dilan labɛn ka ban. N ye Ezipiti jamana faniɲumanɲuman dɔ l'a kan.

¹⁷ N ye tulu kasadiman kɛ n ka layɔrɔ la, mire ta, ni alowɛsi ta, ani kanɛli ta.

¹⁸ Na, an be taga an diya bɔ kosɔbɛ fɔɔ ka se sɔgɔma. An ka nisɔndiya kanuya la.

¹⁹ Bari, n cɛɛ te soo. A tagara taamajan na.

²⁰ A tagara ni nafolo caaman ye. Ni kalo lɔwaati tɛ, a tena segi soo.»

²¹ A ye kanbelen nigɛnigɛ ni kuma diman ye ka se a kɔrɔ. A dalakuma diman y'a sama ka taga n'a ye.

²² A tugur'a kɔ o yɔrɔnin bɛɛ, i ko misi, u be taga ni min ye fagayɔrɔ la, i ko fatɔ, u be tagara min ɲaa gwan!

²³ A be to o la fɔɔ biɲɛ b'a disi sɔgɔ i ko kɔnɔnin min teliyara jaan faan fɛ. A t'a lɔn ko a nii bena to a la.

²⁴ Aw ye tulo malɔ ne fɛ sisan, ne deenw. Aw ka mɛnni kɛ ne dalakan na.

²⁵ Aw ɲaa kana bɔ o muso sifa fɛ. Aw kana siraɲuman bila ka tugu a kɔ.

²⁶ Bari, a ye mɔgɔ caaman mandimi ka kɛ u ben sababu ye. A ye minw faga, olu ka ca.

²⁷ A ka soo ye lahara sira le ye. A be taga ni mɔgɔ ye suuw taayɔrɔ la.