Zanaw 6 - ALA KA KUMA

Kana i tɔɲɔgɔn kunko ta

¹ N deen, e y'i tɔɲɔgɔn dɔ ka juru kunko la i yɛrɛ kan wa? E y'i daa di ko i bena lɔ n'a ye wa?

² N'e y'i daa di, n'i dalakuma y'i siri,

³ i bena min kɛ k'i yɛrɛ bɔsi, o filɛ: I donna i tɔɲɔgɔn bolo ka ban minkɛ, i ka ta'a fɛ k'a daali kosɔbɛ.

⁴ Kana sinɔgɔ dɛ, kan'a to i ɲaa be tugu fewu.

⁵ I yɛrɛ bɔsi i ko mankalanin bɔra donsocɛ bolo. I yɛrɛ bɔsi ka bɔ i jaan kɔnɔ i ko kɔnɔnin.

Salabagatɔ ka koo

⁶ Aw salabagatɔw! Aw ka taga dugumɛnɛ filɛ. Aw k'a ka kɛta kɔlɔsi, ka kɛ hakilitigiw ye.

⁷ Baara kɔlɔsibaga te dugumɛnɛ fɛ, baaraɲamɔgɔ te yen, kuntigi te yen.

⁸ K'a sɔrɔ a b'a ka dumuni tɔmɔ k'a bila tilemana tuma. Sumantigɛtuma na, a b'a ka dumuta cɛ k'a mara.

⁹ Aw salabagatɔw! Aw lanin bena to fɔɔ tuma jumɛn? Aw bena wili tuma jumɛn? Aw bena kunun ka bɔ aw ka sinɔgɔ la tuma jumɛn?

¹⁰ E lo be la ka jan, e lo be la ka sinɔgɔ, e lo te foyi kɛ.

¹¹ Fantanya be na cun i kan i ko soon. Dɛsɛ be na bari i la i ko benkannikɛla.

Mɔgɔjugu ka koo

¹² Mɔgɔ min be galon labɛn, o tigi ye mɔgɔkolon le ye, mɔgɔjugu!

¹³ A b'a ɲaa kamikami, a seen be yirali kɛ. A be taamasiɲɛ kɛ n'a bolokunnadenw ye.

¹⁴ A kɔnɔ ka jugu kosɔbɛ, a be kojugu labɛn tuma o tuma, a be mɔgɔw bila ɲɔgɔn na.

¹⁵ O kama, a halakiko bena kɛ barinako ye. A ta bena cɛn bugubugu, fura t'a la.

Koo minw ka go Masaba ye

¹⁶ Koo wɔɔrɔ be yen, minw man di Masaba ye. U yɛrɛ be se wolonwula ma minw ka go a ye:

¹⁷ yɛrɛboɲa ni galontigɛ, mɔgɔ jalakibali fagali,

¹⁸ kojugu labɛnni, ka teliya kojugukɛ la,

¹⁹ galonseereya, ani ka balimaw bila ɲɔgɔn na.

I yɛrɛ kɔlɔsi kakalaya la

²⁰ N deen, i faa ka ladiliw bato. Kana ban i bamuso ka kuma ma.

²¹ U mara i dusu la tuma bɛɛ. U ka kɛ masirifɛn ye i kaan na.

²² U bena sira yira i la, i tɛmɛyɔrɔ la. U bena i tanga i layɔrɔ la. U bena dɔ fɔ i ye i kununtɔ.

²³ Bari, ladili ye fitinɛ ye. Kalan ye yeelen ye. Ladiliw ye hɛrɛ sira ye.

²⁴ O la, i bena se k'i yɛrɛ kɔlɔsi musokolon na, ani lonanmuso daa diman.

²⁵ Kan'i ɲaa bɔ a ka cɛɲa fɛ. Kan'a to a filɛlikɛcogo b'i kuun ɲagami.

²⁶ Bari, kakalamuso fɛ, e b'i ka dumuta dɔɔni le to yen. Nga i be se ka bɔnɔ e nii na a ka koo la.

²⁷ Mɔgɔ be se ka tasuma bila a ka jufa la ni fani ma jɛni wa?

²⁸ Mɔgɔ be se ka taama takamiw kan, n'a t'i seen jɛni wa?

²⁹ O cogo kelen na, mɔgɔ o mɔgɔ mana gwɛrɛ a tɔɲɔgɔn ka muso la, ale jalakibali te to.

³⁰ Ni soon ye soɲali kɛ dumu kama, dɔgɔya te se ale ma.

³¹ Nga n'a yera, a ben'a bɔɲɔgɔnko wolonwula le sara. A ben'a ka sokɔnɔfɛnw bɛɛ le di.

³² Ni mɔgɔ min ye kakalaya kɛ ni muso wɛrɛ ye, o tigi ye hakilitan ye. A b'a yɛrɛ halakiko le kɛra ten.

³³ A bena bugɔli ni dɔgɔya sɔrɔ. O maloya nin tena ban fewu.

³⁴ Bari, koo nin dimi bena to muso nin cɛɛ la, a be fariya. A mɔnɛ bɔlon mana se, a tena makari.

³⁵ Hali n'u y'a sara, hali n'i ye fɛɛn caaman d'a ma, a tena sɔn u si la.