Zanaw 4 - ALA KA KUMA

Lɔnniya be kunkɔrɔta di mɔgɔ ma

¹ N deenw, aw ye sɔn faa ka ladiliw ma. Aw ye mɛnni kɛ ka ɲa ka kɛ kolɔnbagaw ye.

² Tiɲɛ na, ladili ɲanamanw lo n b'a dira aw ma, aw kana ban ne ka fɔta la.

³ Facɛ tun be n fana fɛ. N koo tun ka di n bamuso ye i ko n kelen tun lo a fɛ.

⁴ Ne facɛ tun be to ka ne ladi ko: «Ne ka kuma to i hakili la. Ne ka fɔtaw bato, i bena sii sɔrɔ.»

⁵ Kɛ kolɔnbaga ni hakilitigi ye. Kana ɲinɛ ne ka kuma fana kɔ, kana ban u la.

⁶ Kana ban lɔnniya la. A bena i mara. A koo diya i yɛrɛ ye. A bena i tanga.

⁷ I ka banba ka koo lɔn, o le ye lɔnniya sɔrɔcogo ye. I ka sɔn k'i ka nafolo bɛɛ di waasa ka kɛ hakilitigi ye.

⁸ A minɛ ka ɲa! A ben'i kunnawolon. N'i y'a minɛ kosɔbɛ, a bena kɛ i kunkɔrɔtabaga ye.

⁹ A bena kɛ i ko fugulanɲuman i kuun na. A bena kɛ masirifɛn ye i kuun na.

Lɔnniya sɔrɔbaga ye sitigi ye

¹⁰ N deen, i tulo malɔ ka sɔn ne ka fɔtaw ma, o bena sijan d'i ma.

¹¹ Ne b'i bilara lɔnniyasira kan. Ne b'i bilara tiɲɛsira kan.

¹² I taamatɔ, i seen bena bila ka ɲa. I bolitɔ, i tena talon.

¹³ I kalanna min na, o minɛ ka ɲa, kan'a to o be bɔ i kunna. A mara ka ɲa, e ka sii sɔrɔ sababu lo.

¹⁴ Kana mɔgɔjuguw ka sira ta, kana kojugukɛlaw ladege.

¹⁵ A ye k'a to, kan'a ta. I yɛrɛ kɔlɔsi a la, tɛmɛ faan wɛrɛ fɛ.

¹⁶ Mɔgɔjugu te la n'a ma kojugu kɛ. A te se ka sinɔgɔ n'a ma koo kɛ mɔgɔ dɔ la.

¹⁷ A ka dumuni be sɔrɔ tilenbaliya la. A ka minnifɛn be sɔrɔ benkanni le la.

¹⁸ Mɔgɔtilennin ka sira be i ko dugugwɛda yeelen, dɔ be to ka fara min kan fɔɔ ka taga tile gwan.

¹⁹ Mɔgɔjugu ka sira dibinin lo. A m'a lɔn a bena talon fɛɛn min na.

²⁰ N deen, i tulo malɔ n ka kuma na, n ka ladili lamɛn kosɔbɛ.

²¹ E hakili kana bɔ u la dɛ, e k'u mara i dusu la kosɔbɛ.

²² Bari, a sɔrɔbaga be sii sɔrɔ, a fana be kɛnɛya sɔrɔ.

²³ I ka janto i kɔnɔnakow la dɛ. Bari, e ka sii sɔrɔko be bɔ o le la.

²⁴ I ka galontigɛ yɔrɔ jaɲa i la, i kana to ka namarakuma fɔ fewu.

²⁵ I ɲaa sin yɔrɔ kelen i ɲafɛ, tilen ka filɛli kɛ i ɲafɛ.

²⁶ I bena sira min ta, a kɔlɔsi ka ɲa. I ka sira ka kɛ siraɲuman ye.

²⁷ I kan'a bila ka taga faan si la. Kana i seen don kojugusira kan.