Zanaw 31 - ALA KA KUMA

Masacɛ bamuso ka kuma

¹ Masacɛ Lemuwɛli bamuso ye ladilikuma min fɔ a ye, o filɛ:

² «Ne deen, ne yɛrɛ woloden, i ka mɛnni kɛ! Ne y'e min ɲini n ka daalili la!

³ Kana i barika don musoko la. Fɛɛn min be masaw ta cɛn, kana o sira nin ta.

⁴ Lemuwɛli, duvɛn man kan ni masacɛ ye. Minnifɛn fariman man kan ni jamana ɲamɔgɔ ye.

⁵ N'a y'a min, sariya min fɔra, a bena ɲinɛ n'o ye. O bena kɛ sababu ye ka ben dɛsɛbagatɔw kan.

⁶ Mɔgɔ min be tagara sayɔrɔ, minnifɛn fariman d'a le ma. Mɔgɔ min dusu kasinin lo, duvɛn d'a le ma.

⁷ A b'a min ka ɲinɛ a ka fantanya kɔ. A hakili te to a ka tɔɔrɔ la tugu.

⁸ Mɔgɔ minw te jati, kuma k'olu bɔ bolo la. Mɔgɔ minw lɔgɔ bɔra, kuma ka olu dɛmɛ.

⁹ Kiti tilennin tigɛ ka tiɲɛ fɔ fantanw ni dɛsɛbagatɔw ka koo la.»

Musoɲuman ka koo

¹⁰ Musoɲuman, jɔn le ben'a sɔrɔ? A koo ka gwɛlɛ ka tɛmɛ kɔnɔkisɛ kan.

¹¹ A cɛɛ lanin b'a la kosɔbɛ. A cɛɛ tena kɛ fantan ye fewu.

¹² A be baara kɛ a cɛɛ ka makoɲa le kama a sii tile bɛɛ la, a t'a kɛ a makosa kosɔn.

¹³ A be sagasi ni jese ɲanaman yaala, a bolow be baara kɛ kosɔbɛ.

¹⁴ A kɛra i ko jagokɛlaw ka kurunw, a be bɔ n'a ka dumuni ye yɔrɔjan.

¹⁵ A be wili joona ni dugu ma gwɛ fɔlɔ ka dumuni labɛn a ka mɔgɔw ye ka baara tilan a ka baaradenmusow ye.

¹⁶ A be miiri foro la k'a san. A b'a ka baara tɔnɔ kɛ ka *ɛrɛzɛn tutu a kɔnɔ.

¹⁷ A b'a cɛɛ siri ni barika ye k'a bolo lamaga.

¹⁸ A b'a ye ko ale ka koow be ɲana. A ka fitinɛ te faga sufɛ.

¹⁹ A be paratali kɛ. A bolokunnadenw be fanidanbaara la.

²⁰ A be fantanw sɔn. A bolo be dɛsɛbagatɔw wasa.

²¹ A te siran ko nɛnɛ ben'a ka somɔgɔw sɔrɔ bari, fani b'a ka somɔgɔw labɔ.

²² A be kosow dan a yɛrɛ ye. A ka faniw ye faniɲumanw ni dakamanafaniw ye.

²³ A cɛɛ ye mɔgɔbaba ye, boɲa b'a kan. A niin be cɛkɔrɔbaw ka kolatigɛ jɛnkulu la.

²⁴ A be faniw dan k'u feere. A be cɛsirilanw di jagokɛlaw ma.

²⁵ A ka masirifɛn ye fanga ni hɔrɔnya ye. A te siran sini koo la.

²⁶ A be kuma ni hakilitigiya ye. Ladiliɲuman be bɔ a daa la.

²⁷ A b'a ka soo kɔnɔ koow kɔlɔsi. A te salabagatɔya kɛ.

²⁸ A deenw b'a tɔgɔɲuman fɔ kosɔbɛ. A cɛɛ b'a tanu ko:

²⁹ «Muso caaman b'u taamacogo ɲa. Nga ele kɔni tɛmɛna u bɛɛ kan.»

³⁰ Muso ka ɲumanya be mɔgɔ fili, cɛɲa be tɛmɛ. Nga muso min be siran Masaba ɲa, ale lo ka kan ni tanuli ye.

³¹ A ka ɲi k'a ka baara tɔnɔ sɔrɔ. Dugu mɔgɔw ka kan k'a tanu a ka baara kosɔn.