Zanaw 30 - ALA KA KUMA

Aguri ka kuma

¹ Yake dencɛ Aguri ka kuma. A ye kuma min fɔ Itiyɛli ye. A ya fɔ Itiyɛli ni Ukali ye.

² Tiɲɛ na, ne le nalonna ka tɛmɛ mɔgɔw bɛɛ kan. Adamadenya la, ne kɛra hakilitan ye.

³ Ne ma lɔnniya sɔrɔ, min be kɛ sababu ye n be Ala lɔn.

⁴ Jɔn yɛlɛla sankolo la, ka kɔsegi ka na? Jɔn delila ka fɔɲɔ minɛ n'a bolo ye? Jɔn le sera ka jiiw mara ka ye a ka fani la? Jɔn le ye diɲɛ daan bɔ? O tigi tɔgɔ be di? A deen tɔgɔ be di fana? O fɔ n ye n'i b'a lɔn!

⁵ Ala ka kuma bɛɛ ye tiɲɛ ye. Mɔgɔ min b'a yɛrɛ kalif'a ma, a b'o tigi sutara.

⁶ Kana foyi fara a ka kuma kan. N'o tɛ, a b'i jalaki k'a yira ko i ye galontigɛla ye.

⁷ Ne be fɛɛn fila daali e Masaba fɛ, kana ban k'o kɛ n ye fɔɔ ka taga n sa.

⁸ Ne kisi namarakuma ni galon ma, ne kisi fantanya ni nafolotigiya ma, n ka balo dama di n ma.

⁹ Nafolocaya kan'a kɛ ne be tigɛ i la k'a fɔ ko: «Masaba ye jɔn ye?» Walima dɛsɛ kana ne bila soɲani na, min bena ele, ne ka Ala tɔgɔ cɛn.

¹⁰ Kana galon la jɔɔn kan a kuntigi fɛ. N'o tɛ, a bena i danga, a ka danga fana bena i minɛ.

¹¹ Mɔgɔ dɔw be u faa danga, u te kumaɲuman fɔ u baa ye fewu!

¹² Mɔgɔ dɔw b'u yɛrɛ jati mɔgɔ gwɛninw ye k'a sɔrɔ u saniyanin tɛ fewu!

¹³ Mɔgɔ dɔw b'u yɛrɛ boɲa, u te tɔw jati!

¹⁴ Mɔgɔ dɔw ɲiiw be i ko murujanjanw, u yewagaw be i ko muruw, u labɛnnin lo ka fantanw ta cɛn jamana kɔnɔ ani ka dɛsɛbagatɔw niin bɔ mɔgɔw la.

Talen dɔ wɛrɛw

¹⁵ Denmuso fila be nɔri fɛ, minw ko: «A di, a di!» Fɛɛn saba be yen minw te wasa fewu. Naani be yen minw t'a fɔ fewu ko: «A ka ɲi ten!»

¹⁶ Lahara, ni muso wolobali, jii te dugukolo min labɔ ani tasuma, min t'a fɔ fewu ko: «A ka ɲi ten!»

¹⁷ Mɔgɔ min b'a ɲaa don a facɛ la, n'a te mɛnni kɛ a bamuso fɛ, badala kaankaanw le bena o tigi halaki, sɛgɛnw le ben'a dumu.

¹⁸ Koo saba filɛ minw be ne dabari ban. Naani lo yɛrɛ, n te minw faamu:

¹⁹ sɛgɛn tɛmɛcogo sankolo la, saa tɛmɛcogo fara kan, kurun tɛmɛcogo kɔgɔji kan, fɛɛn min be cɛɛ ɲasin muso ma.

²⁰ Kakalamuso ta filɛ: a be kakalaya kɛ ka tila k'a fɔ ko ale ma foyi kɛ.

²¹ Koo saba filɛ minw be jamana ɲagami. Naani yɛrɛ lo minw te kun jamana kɔnɔ:

²² Jɔɔn ka kɛ masacɛ ye, naloman ka dumuni sɔrɔ fɔɔ ka wasa,

²³ muso sɔnjugu ka furu sɔrɔ, baaradenmuso k'a kuntigimuso cɛɛn ta.

²⁴ Fɛɛn naani filɛ minw ka dɔgɔ dugukolo kan haali, nga u hakili ka bon kosɔbɛ.

²⁵ Barika te dugumɛnɛw la, nga u b'u ka makoya dumuni kafo tilemana tuma le.

²⁶ Barika te farawonyinanw na, nga u b'u ka layɔrɔ bɔ fara la le.

²⁷ Masa te tɔɔnw fɛ, nga u be pan jɛnkulu jɛnkulu.

²⁸ Mɔgɔ be se ka basan minɛ n'a bolo ye, nga a be taga don fɔɔ masacɛw ka soo kɔnɔ.

²⁹ Fɛɛn saba be yen minw taamacogo ka ɲi. Naani yɛrɛ lo minw taamacogo ka fisa:

³⁰ Jara, fangatigi lo kongosogow cɛma, a te boli foyi ɲa.

³¹ Kongofali min kɔgɔnin lo kosɔbɛ, ni bakɔrɔnin, ani masacɛ min b'a ka kɛlɛdenw ɲafɛ.

³² Ni nalomanya y'i bila yɛrɛboɲa na, ni miirijugu b'i kɔnɔ, i bolo la i daa la.

³³ Bari, n'i ye nɔnɔ gosi, naare be bɔ a la, n'i y'i nuun bugɔ, joli bena bɔ a la, n'i ye dusu gwanko kɛ, i be kɛlɛ wili.