Zanaw 29 - ALA KA KUMA

¹ Mɔgɔ min te sɔn ka ye ladili ma, o tigi bena bari ka halaki, fura tena sɔrɔ a la.

² Ni mɔgɔtilenninw be fanga la, fasodenw be nisɔndiya. Nga ni mɔgɔjugu lo, fasodenw be ŋunan.

³ Hakilitigiya koo ka di mɔgɔ min ye, o tigi b'a facɛ nisɔndiya. Nga mɔgɔ min be taga kakalamusow fɛ, ale b'a ka nafolo cɛnna.

⁴ Masacɛ ka tilenninya barika la, jamana be ɲa. Nga n'a be lɛnpogwɛlɛnw sigi, a b'a nagasi.

⁵ Mɔgɔ min b'a mɔgɔɲɔgɔn nigɛ, o tigi be jaan lar'a yɛrɛ ɲa.

⁶ Mɔgɔjugu ka kojugu ye jaan ye a yɛrɛ ma. Nga mɔgɔtilenninw be nisɔndiya kosɔbɛ.

⁷ Fantanw ka kan ni min ye, mɔgɔtilennin be janto o la. Nga o hakili te mɔgɔjugu fɛ ka se k'o lɔn.

⁸ Mɔgɔlɔgɔbɔbagaw be dugumɔgɔw ɲagami, nga hakilitigiw b'u dusu suma.

⁹ Ni kiti donna hakilitigi ni naloman cɛ, hakilitigi dimina wo, a yɛlɛla wo, hɛrɛ tena sɔrɔ a fɛ.

¹⁰ Hɔrɔn koo ka go mɔgɔfagala ye. Nga mɔgɔtilenninw b'a tanga.

¹¹ Naloman te mɛn k'a ka dimi bɛɛ yira. Nga hakilitigi b'a ta minɛ ka ɲa, k'a muɲu.

¹² Ni kuntigi tora ka mɛnni kɛ galontigɛlaw fɛ, a ka ɲamɔgɔw be kɛ mɔgɔkolonw ye.

¹³ Fantan ni mɔgɔtɔɔrɔbaga bɛɛ ka koo ye kelen ye. Masaba le be ɲaa di u bɛɛ ma.

¹⁴ Masacɛ min be fantanw ka koo ɲanabɔ ni tilenninya ye, ale ka masaya be sabati tuma bɛɛ.

¹⁵ Bere ni ladili be hakili di mɔgɔ ma. Nga deen min labilara, ale be maloya bila a bamuso la.

¹⁶ Ni mɔgɔjuguw cayara, kojugu fana be caya. Nga mɔgɔtilenninw bena u nagasitɔ ye.

¹⁷ I deen ladi dɛ, o la, i bena ɲasuma sɔrɔ. A bena e nisɔndiya.

¹⁸ Kiraya tanya kosɔn, jamanadenw be taga u kunfɛ. Sariya batobaga kɔni bena duba sɔrɔ.

¹⁹ Kuma te jɔɔn ladifɛn ye, hali n'a y'a faamu, a ten'a kɛ.

²⁰ Naloman ka fisa ni mɔgɔ ye min be kuma k'a sɔrɔ a te miiri.

²¹ Jɔɔn min minɛcogo ɲana kojugu kabini a kanbelentuma, ale laban b'a yɛrɛ jati a tigi deen ye.

²² Dusubatigi be kɛlɛ wili. Dusubatigi be kojugu caaman kɛ.

²³ Adamaden ka yɛrɛboɲa b'a dɔgɔya. Nga yɛrɛmajigi miiriya be min fɛ, o tigi bena boɲa sɔrɔ.

²⁴ Soon bololafɛn minɛbaga be kojugu kɛr'a yɛrɛ la. U ye wango la k'a tigi danga, a b'o kala ma nga a te foyi fɔ.

²⁵ Ka siran adamaden ɲa, o laban ka jugu. Nga mɔgɔ min y'a jigi la Masaba kan, o tigi be sutara la.

²⁶ Mɔgɔ caaman be dɛmɛ ɲini jamana ɲamɔgɔ fɛ, nga Masaba dɔrɔn le be se ka tiɲɛ di.

²⁷ Mɔgɔjugu koo ka go mɔgɔtilennin ye. Mɔgɔtilennin koo ka go mɔgɔjugu ye.