Zanaw 25 - ALA KA KUMA

Solomani ka talen wɛrɛw sɛbɛ

¹ Solomani ka talen dɔw filɛ nin ye, Zuda masacɛ Ezekiyasi ka mɔgɔw y'u sɛbɛn.

² Ala ka boɲa ye ka koow dogo. Masacɛ ka boɲa ye ka koow sɛgɛsɛgɛ.

³ Sankolo yɔrɔ jaɲa te lɔn, dugukolo kɔnɔ duɲa te lɔn fana. O cogo kelen na, masaw kɔnɔnakow fana te lɔn.

⁴ Warigwɛ nɔgɔ bɔ a la, warigwɛbaarabaga be se k'a baara o tuma na.

⁵ Mɔgɔjugu bɔ masacɛ ɲa, a ka masaya bena sabati tilenninya barika la.

⁶ Kan'i yɛrɛ boɲa masacɛ ɲakɔrɔ. Kan'i yɛrɛ bila mɔgɔbayɔrɔ la.

⁷ A ka fisa u k'i wele ka lɔyɔrɔba d'i ma sanni u k'i dɔgɔya mɔgɔbaba dɔ kosɔn. I ɲaa lara fɛɛn min kan,

⁸ kana kɔrɔtɔ o ɲafɔko la kititigɛyɔrɔ la. N'o tɛ, n'i kɛlɛɲɔgɔn y'i maloya, a laban na, i ben'a kɛ di?

⁹ Ni koo donna e ni dɔ cɛ, a ɲanabɔ n'a tigi ye. Nga kana mɔgɔ wɛrɛ ka gundo fɔ.

¹⁰ N'o tɛ, o tigi bena i nɛni a mɛntɔ, i tena se ka bɔyɔrɔ sɔrɔ o kuma na.

¹¹ Kuma min kɛcogo ɲana, o ni sanu ɲɛgɛnni, ka warigwɛ kɛ a la bɛɛ ka kan.

¹² Bololanigɛ ni kɔnɔkisɛ sanulaman be cogo min na, hakilitigi ka ladili be ten a mɛnbaga fɛ.

¹³ Jisuma be mɔgɔ kaan suma cogo min na funteni tuma na, cidensɔbɛ b'a cibaga, a kuntigi dusu suma ten fana.

¹⁴ Mɔgɔ min b'a yɛrɛ boɲa, ko a be fɛɛn di mɔgɔ ma, k'a sɔrɔ a t'a kɛ, o tigi be i ko saan min finna, fɔɲɔ wilila, sanji ma na.

¹⁵ Muɲuli barika la, mɔgɔ be se kititigɛla kɔrɔ. Kuma diman be se ka mɔgɔ barikaman magaya.

¹⁶ N'i ye lii sɔrɔ, a dumu ka kɛɲɛ, n'o tɛ, i ben'a fɔɔnɔ i fanin kɔ.

¹⁷ Kana taga i sigiɲɔgɔn fɛ tuma bɛɛ, n'o tɛ, n'a sigɛnna e kɔrɔ, e koo bena goya a ye.

¹⁸ Mɔgɔ min be galon seereya la a tɔɲɔgɔn kan, o tigi ni bere ni murujan ani biɲɛ le ka kan.

¹⁹ Mɔgɔ min b'a jigi la namaramɔgɔ kan gwɛlɛya loon na, o tigi be kɛ i ko a ɲiin karinin lo ani a seen mugunin.

²⁰ Ka dɔnkili la dusukasitɔ ye, o ni mɔgɔ ka nɛnɛdulɔki bɔko le ye kelen ye nɛnɛlon na, walima ka vinɛgiri kɛ joli la.

²¹ Ni kɔngɔ b'i jugu la, dumuni d'a ma. Ni minnɔgɔ b'a la, jii d'a ma.

²² N'i y'o kɛ, a bena kɛ i ko i ye takami le bon a kunna. Masaba le bena i sara.

²³ Kɔrɔnfɛ fɔɲɔ be na ni sanji ye. Kumakolon be na ni ɲakumu ye.

²⁴ Mɔgɔ ka si kɛnɛma, o ka fisa ka to boon kɔnɔ ni muso kɛlɛtigɛla ye.

²⁵ Jisuma koo ka di minnɔgɔtɔ ye cogo min na, kibaru diman min bɔra yɔrɔjan, be ten le a mɛnbagaw fɛ.

²⁶ Jii bɔyɔrɔ, walima kɔlɔnji duurunin be cogo min na, mɔgɔtilennin k'a to mɔgɔjugu ta ma, o be ten.

²⁷ Lii dumukojugu ma ɲi. Boɲa ɲinikojugu fana ma ɲi.

²⁸ Mɔgɔ min te se k'a yɛrɛ minɛ, o tigi ni dugu labilanin le ka kan.