Zanaw 21 - ALA KA KUMA

¹ Masacɛ hakili be i ko jii woyota Masaba bolo. Yɔrɔ min man'a diya, a b'a ɲasin yen.

² Mɔgɔ ka kɛwaliw bɛɛ ka ɲi a yɛrɛ ɲana. Nga Masaba le be mɔgɔw kɔnɔnakow cogoya lɔn.

³ Ka ɲumanya ni tilenninya kɛ, o le ka di Masaba ye ka tɛmɛ saraka kan.

⁴ Yɛrɛboɲa ni yɛrɛfunu, o ye koo ye min be mɔgɔjugu ka juguya yira.

⁵ Baarakɛbaga ka jatiminɛ be na ni nafolo ye. Kɔrɔtɔkojugu be laban ni dɛsɛ ye.

⁶ Mɔgɔ minw be nafolo sɔrɔ galon barika la, o tigiw ye nalomanw ye minw b'u yɛrɛ ka saya ɲini.

⁷ Mɔgɔjugu ka fariya le b'a ta cɛn. Bari, a te sɔn ka tilenninyako kɛ.

⁸ Mɔgɔ nijugu ka koo tilennin tɛ. Nga mɔgɔ kɔnɔgwɛ ka kɛwali tilennin lo.

⁹ Mɔgɔ ka si kɛnɛma, o ka fisa ka to boon kɔnɔ ni muso kɛlɛtigɛla ye.

¹⁰ Kojugukɛ le ka di mɔgɔjugu ye, hali a te makari a teri yɛrɛ la.

¹¹ N'u ye yɛrɛboɲala ɲaa gwan, o be hakili di naloman ma. N'u ye hakilitigi ladi, o be lɔnniya d'a ma.

¹² Tilenninyatigi ɲaa be mɔgɔjugu ka soo kan. A be bɔnɛ ben mɔgɔjuguw kan.

¹³ Ni mɔgɔ min y'a tulo tugu dɛsɛbagatɔ kasikan na, o tigi fana bena daalili kɛ loon dɔ ka dɛsɛ, a tena jaabibaga sɔrɔ.

¹⁴ Ni mɔgɔ dusu gwanna, ka fɛɛn d'a ma dogo la, o le y'a sumafɛn ye. N'a gwanna papapa, ka boɲafɛn d'a ma dogodogo la, o le y'a fura ye.

¹⁵ Ka tilenninyako kɛ, o ye nisɔndiya ye mɔgɔtilennin fɛ. Nga kojugukɛla fɛ, o ye balawu ye.

¹⁶ Mɔgɔ o mɔgɔ mana hakilitigiya sira bila, o tigi be tagara to ni suuw ye.

¹⁷ Nisɔndiyako ka di mɔgɔ min ye, o tigi be kɛ dɛsɛbagatɔ ye. Duvɛn ni faamadumuni ka di mɔgɔ min ye, o tigi te kɛ nafolotigi ye.

¹⁸ Mɔgɔjugu bena kɛ mɔgɔɲuman ka kunmabɔfɛn ye. Janfamɔgɔ bena kɛ mɔgɔtilennin ta ye.

¹⁹ Mɔgɔ ka sigi yɔrɔlakolon na, o ka fisa i ka sigi ni muso kɛlɛtigɛla, ni mɔgɔ nidegunbaga ye.

²⁰ Nafoloɲuman ni fɛnsɔbɛw be sɔrɔ hakilitigi ka soo. Nga naloman kɔni b'a taw cɛn le.

²¹ Mɔgɔ min be tilenninya ni ɲumanya kɛ, o tigi be sii sɔrɔ, u ben'a minɛ ni tilenninya ani boɲa ye.

²² Hakilitigi be se ka cɛfariw ka dugu minɛ. U jigi lanin be dugu yɔrɔɲuman min kan, a b'o halaki.

²³ Mɔgɔ min be se a daa minɛcogo la, o tigi b'a yɛrɛ tanga dusukasi ma.

²⁴ Yɛrɛboɲala yadanin le be mɔgɔ jagabɔ. Yɛrɛboɲa be ye a ka kɛtaw bɛɛ la.

²⁵ Salabagatɔ nigɛlako b'a faga, bari, a fari te sɔn baara ma.

²⁶ Fɛɛnw nigɛ le b'ale la tile kuturu kɔnɔ. Mɔgɔtilennin be dili kɛ hali a te sigɛn.

²⁷ Mɔgɔjuguw ka saraka ye fɛnjugu ye, sankofɛrɛ n'u y'a bɔ ni miiriyajugu ye.

²⁸ Seere galontigɛla kɔni ta bena cɛn. Nga mɔgɔ min b'a tulo malɔ, fɔta b'ale fɛ kudayi.

²⁹ Mɔgɔjugu b'a ɲaa kumu ka mɔgɔw bila fili la. Nga mɔgɔtilennin b'a taamacogo kɔlɔsi.

³⁰ Adamaden ka lɔnniya, a ka hakilitigiya, walima a ka miiriya te yɛlɛmani don Masaba sago la.

³¹ Mɔgɔ be soo labɛn kɛlɛ kama, nga see sɔrɔko be bɔ Masaba le fɛ.