Zanaw 19 - ALA KA KUMA

¹ Fantan min taamacogo ka ɲi, o ka fisa ni naloman kumakolon fɔbaga ye.

² Kolɔnbaliya ma ɲi mɔgɔ si fɛ. Mɔgɔ min be teliya kojugu, o tigi be fili.

³ Mɔgɔ ka nalomanya b'a bila sirajugu kan. A be sɔrɔ ka dimi Masaba kɔrɔ.

⁴ Nafolotigi teriw ka ca, nga fantan kɔni be fɔn a teri la.

⁵ Seerekolon ɲagwanbali tena to. Galontigɛla tena kisi.

⁶ Mɔgɔ caaman b'a fɛ k'u koo diya mɔgɔbaba ye. Mɔgɔ min be mɔgɔ sɔn, bɛɛ y'o tigi teri ye.

⁷ Fantan koo ka go a balimaw bɛɛ ye. A teriw boliko te fɔ tugu! N'a b'a fɛ ka kuma n'u ye, a te mɔgɔ si ye.

⁸ Mɔgɔ min be miiri, o tigi b'a yɛrɛ ka hɛrɛ fɛ. Ni mɔgɔ min tora hakilitigiya la, o tigi bena dagamu.

⁹ Seerekolon ɲagwanbali tena to. Galontigɛla bena halaki.

¹⁰ Naloman man kan ni fɛntigiya ye. Jɔɔn ka sigi masadenw kunna, o fana man fisa fewu.

¹¹ Hakilitigi te dimi joona. Ka yafa a hakɛ tabagaw ma, o y'a ka kunkɔrɔta ye.

¹² Masacɛ diminin be i ko jara sɔngɔtɔ. Nga a ka ɲumanya be i ko komiji, biin kan.

¹³ Deen naloman b'a facɛ mako sa. Muso kɛlɛtigɛla be i ko boon min be sooro.

¹⁴ Mɔgɔ be soo, ni nafolo sɔrɔ faa cɛɛn na. Nga muso hakilitigi ye Masaba ka sɔnfɛn ye.

¹⁵ Salabagatɔya be mɔgɔ bila sinɔgɔ la. Baarakɛbali kɔni bena to kɔngɔ la sa.

¹⁶ Mɔgɔ min be sariyaw bato, o tigi b'a nii kisi. Min t'a yɛrɛ taamacogo kɔlɔsi, o tigi bena sa.

¹⁷ Ka koɲuman kɛ dɛsɛbagatɔ ye, o ye jurudon ye Masaba la, min be koɲuman juru sara.

¹⁸ N'i jigi b'i deen ka ɲa kan, a ladi dɛ. Nga i kana dimi a kɔrɔ fɔɔ k'a faga.

¹⁹ Dusutigi ɲaa ka kan ka gwan. N'i y'a to, o be dɔ fara a ka juguya kan.

²⁰ I tulo malɔ ladilikan na, sɔn mɔgɔ ka fɔta ma, janko a laban na, i fana ka kɛ lɔnnikɛla ye.

²¹ Mɔgɔ kɔnɔnako ka ca. Nga Masaba sago ye min ye, o le be kɛ.

²² Fɛɛn min be laɲini adamaden fɛ, o ye kantigiya le ye. Ka kɛ dɛsɛbagatɔ ye, o ka fisa ka kɛ galontigɛla ye.

²³ Masaba ɲasiran be sii di mɔgɔ ma. A ɲasiranbaga be wasa, ka si hɛrɛ la.

²⁴ Salabagatɔ b'a bolo don dumunikɛminan kɔnɔ. Ka na n'a ye a daa la, o ye baara ye.

²⁵ Ka mɔgɔjagabɔbaga bugɔ, o be kolɔnbali hakilitigiya. Ka hakilitigi ladi, o be dɔ fara a ka lɔnniya kan.

²⁶ Deen min b'a facɛ mako sa, k'a bamuso bila boli la, o ye deen ye min be maloya ni dɔgɔya se mɔgɔ ma.

²⁷ N deen! N'i ma sɔn ladili ma, i yɔrɔ bena jaɲa lɔnniya la.

²⁸ Seerekolon mako te tilenninya la. Mɔgɔjugu daa fanin be juguman le la.

²⁹ Ɲagwan labɛnnin lo mɔgɔjagabɔbagaw le kama. Bere labɛnnin lo nalomanw kɔɔ kama.