Zanaw 17 - ALA KA KUMA

¹ Mɔgɔ ka dumuni janin fitini sɔrɔ k'o dumu hɛrɛ la, o ka fisa ka dumuniba kɛ soo kɔnɔ kɛlɛ be min na.

² Baaraden hakiliman b'a kuntigi ka denkolon nɔɔ ta. A bena kɛ cɛntabagaw cɛma soo kɔnɔ.

³ Warigwɛ ni sanu be sɛgɛsɛgɛ tasuma kɔnɔ. Nga Masaba le be adamaden dusu sɛgɛsɛgɛ.

⁴ Kojugukɛla b'a tulo malɔ kumajugu fɛ. Galontigɛla b'a tulo dɛn nɛndenjugu lamagatɔ fɛ.

⁵ Mɔgɔ min be dɛsɛbagatɔ dɔgɔya, o tigi b'a ɲaa don Danbaga la. Mɔgɔ min be nisɔndiya bɔnɛ la, o tigi te to ɲagwanbali ye.

⁶ Mamadenw le ye mɔgɔkɔrɔbaw ka kunkɔrɔtafɛn ye. Wolobagaw le ye deenw ka boɲasɔrɔfɛn ye.

⁷ Kumaɲuman te bɔ naloman daa la ka ye cogo min na, o cogo kelen la, galon ma ɲi ɲamɔgɔ daa la.

⁸ Mɔgɔ dɔ ka miiri la, ko daa sanfɛn le bena kɛ a ma kunnadiya ye. A be miiri ko a ka koo bɛɛ bena ɲa o sababu la.

⁹ Mɔgɔ min be ɲinɛ a tɔɲɔgɔn ka kojuguw kɔ, o tigi be barika don teriya la. Nga min b'a fɔ, ale be terimanw faran.

¹⁰ Jalaki be digi hakilitigi la ka tɛmɛ golokami ɲaa kɛmɛ kan naloman na.

¹¹ Mɔgɔjugu be murutili le fɛ, ciden fariman bena ci a kama.

¹² Ka wara kunbɛn u ye min deen faga, o ka fisa ka naloman kunbɛn a ka nalomanya la.

¹³ Mɔgɔ min be koɲuman sara ni kojugu ye, kojugu te fɔn a tigi ka soo.

¹⁴ Ka kɛlɛ daminɛ ani ka dalan kari, o ye kelen ye. Sanni sɔsɔli ka gwan, i k'a dabila.

¹⁵ Ka kojugukɛla to yen, ka tiɲɛtigi jalaki, o ye koo fila ye min ka go Masaba ye.

¹⁶ Ka lɔnniya sansɔngɔ don naloman bolo, o be mun ɲa? Bari hakili t'a fɛ.

¹⁷ Terimanw koo ka di ɲɔgɔn ye waati bɛɛ, nga i baden ta ye waatigwɛlɛnw tuma le ye.

¹⁸ Hakilitan le b'a daa di ko a be lɔ n'a mɔgɔɲɔgɔn ka juru ye.

¹⁹ Kɛlɛ koo ka di mɔgɔ min ye, hakɛ le ka di o tigi ye. Mɔgɔ min b'a yɛrɛ boɲa, o tigi be halakili le fɛ.

²⁰ Mɔgɔ min kɔnɔnako ma ɲi, o tigi tena hɛrɛ sɔrɔ. Mɔgɔ min daa ma ɲi, bɔnɛ bena ben o tigi kan.

²¹ Naloman wolobaga ta ye tɔɔrɔ ye. A facɛ dusu te diya ka ye.

²² Nisɔndiya be banabagatɔ kɛnɛya. Dusukasi be mɔgɔ fasa.

²³ Mɔgɔjugu le be daa sanfɛn minɛ dogo la ka sɔrɔ ka kiti tilenbali tigɛ.

²⁴ Hakilitigi te fili lɔnniyako ma. Nga min te se ka kɛ, naloman b'o le kan.

²⁵ Deen naloman ye a facɛ ka dusukasifɛn ye. A bamuso ta ye nimisa le ye.

²⁶ Ka alamaani la mɔgɔtilennin kan, o ma ɲi. Ka mɔgɔbaba bugɔ fana, o te koo daganin ye.

²⁷ Mɔgɔ min b'a yɛrɛ kumacogo kɔlɔsi, o tigi ye kolɔnbaga ye. Mɔgɔ min sabalinin be, o tigi ye hakilitigi ye.

²⁸ Ni naloman jera, a be se ka jati lɔnnikɛla ye. N'a ma kuma, a be se ka jati hakilitigi ye.