Zanaw 16 - ALA KA KUMA

¹ Mɔgɔ be koo latigɛ a kɔnɔ, nga a kɛko ye Masaba ta ye.

² Mɔgɔ ka kɛwaliw bɛɛ ka ɲi a yɛrɛ ɲana, nga Masaba le be mɔgɔw kɔnɔnakow cogoya lɔn.

³ I kɔnɔnako fɔ Masaba ye, i ka koo latigɛninw bena ɲa.

⁴ Kuun be Masaba ka fɛɛn danninw bɛɛ la, hali mɔgɔjugu, min dankun ye ka tɔɔrɔ loon dɔ.

⁵ Yɛrɛboɲala koo ka go Masaba ye. Siga t'a la, a ɲagwanbali tena to.

⁶ Ɲumanya ni tiɲɛ kosɔn, kojuguw yafa be sɔrɔ. Mɔgɔ be kojugu dabila Masaba ɲasiran kosɔn.

⁷ Ni mɔgɔ min taamacogo diyara Masaba ye, a be bɛɛn don o tigi n'a juguw cɛ.

⁸ Ka fɛnfitini sɔrɔ ni tilenninya ye, o ka fisa ka fɛɛn caaman sɔrɔ namara la.

⁹ Mɔgɔ b'a yɛrɛ ka koo jati minɛ, nga a kɛko be Masaba le bolo.

¹⁰ Masacɛ be kuma ni Ala ka sebagaya ye. N'a be kiti tigɛ, a te fili.

¹¹ Sumanikɛminan ɲumanw le ka di Masaba ye. A be sumanikɛcogo latigɛ.

¹² Kojugukɛ ka go masaw ye. Bari, masaya be sabati tilenninya le kɔnɔ.

¹³ Masaw be kumatilennin fɔbaga le fɛ. Tiɲɛfɔla koo le ka di u ye.

¹⁴ Masacɛ ka dimi be na ni mɔgɔfaga ye. Nga kolɔnbaga b'a dusu suma.

¹⁵ Ni masacɛ nisɔn ka di, o ye hɛrɛ ye. A be koɲuman kɛ i ko samiɲa donda sanji.

¹⁶ Ka lɔnniya sɔrɔ, o ka fisa ni sanu ye. Ka hakilitigiya sɔrɔ, o ka fisa ni warigwɛ ye.

¹⁷ Mɔgɔtilennin be kojugu dabila. Bari yɛrɛminɛbaga le be sii sɔrɔ.

¹⁸ Yɛrɛboɲa be na ni makosa ye. Yada be na ni halakili ye.

¹⁹ Ka to dɛsɛ la ni dɛsɛbagatɔw ye, o ka fisa ka jɛn ni yɛrɛboɲalaw ye benkannifɛn kan.

²⁰ Mɔgɔ min be jatiminɛ kɛ koo la, o tigi ta be ɲa. Mɔgɔ min b'a jigi la Masaba kan, o tigi dagamunin lo.

²¹ Lɔnnikɛla le be wele hakilitigi. Kuma diman be se mɔgɔ kɔrɔ.

²² Lɔnniya be sii di kolɔnbaga ma. Naloman ka fatɔyako le b'a ɲaa gwan.

²³ Lɔnnikɛla be miiri ka sɔrɔ ka kuma, o la, a ka kuma be don mɔgɔ la.

²⁴ Kuma diman be i ko lii. A ka di daa la, a be farikolo mako ɲa fana.

²⁵ Mɔgɔ be se ka sira dɔ jati siraɲuman ye, k'a sɔrɔ o be laban ni saya ye.

²⁶ Dumuni nigɛ be barika don baarakɛla la bari, a b'a fɛ k'a ka kɔngɔ nɔgɔya.

²⁷ Mɔgɔkolon be kojugu le labɛn. A daa ka fari i ko tasuma.

²⁸ Namaramɔgɔ be kɛlɛ wili. Nafigi be terimanw faran.

²⁹ Mɔgɔ fariman b'a tɔɲɔgɔn nigɛ k'a bila sirajugu kan.

³⁰ Mɔgɔ min b'a ɲaa tugu ka kojugu miiri, k'a daa cin, o tigi ye kojugu kɛ ka ban.

³¹ Kunsigigwɛ ye kunkɔrɔtafɛn ye, a be sɔrɔ tilenninyasira le kan.

³² Mɔgɔ dususumanin ka fisa ni cɛfari ye, yɛrɛminɛbaga ka fisa ni dugu minɛbaga ye.

³³ U be kolon le fili janko ka koo nata lɔn, nga Masaba le be koo latigɛ.