Zanaw 15 - ALA KA KUMA

¹ Jaabi ɲanaman be mɔgɔ dusu suma, kuma fariman be mɔgɔ dusu wili.

² Lɔnnikɛla ka kuma be lɔnniya nigɛ don mɔgɔw la. Nga foyi te bɔ naloman daa la ni nalomanyakuma tɛ.

³ Masaba ɲaa be yɔrɔ bɛɛ la, a be mɔgɔjugu ni mɔgɔɲumanw kɔlɔsi.

⁴ Kumaɲuman be sii di mɔgɔ ma, kumajugu be mɔgɔ nii tɔɔrɔ.

⁵ Deen naloman le be ban a faa ka ladili ma. Mɔgɔ min be sɔn ladili ma, o tigi ye hakilitigi ye.

⁶ Nafolo caaman be sɔrɔ mɔgɔtilennin ka soo. Nga mɔgɔjugu ka sɔrɔ be na ni sigɛn ye.

⁷ Lɔnnikɛla dalakuma be lɔnniya di mɔgɔ ma. Nga nalomanw ta ye fuu ye.

⁸ Mɔgɔjugu ka saraka koo ka go Masaba ye. Nga a be mɛnni kɛ mɔgɔtilennin ka daalili la.

⁹ Mɔgɔjugu taamacogo ka go Masaba ye. Nga mɔgɔ minw be tilenninya kɛ, olu koo ka d'a ye.

¹⁰ Ɲagwan ye sira bilabagaw ta ye. Ladili gwɛlɛman ka go mɔgɔ min ye, o tigi bena sa.

¹¹ Lahara koo be Masaba ɲakɔrɔ, kuma te adamadenw kɔnɔnakow ma.

¹² Yɛrɛboɲala te sɔn jalaki ma. A te ladili ɲini lɔnnikɛlaw fɛ.

¹³ Mɔgɔ nisɔndiyanin ɲada ka di. Dusukasi be na ni farifaga ye.

¹⁴ Hakilitigi be lɔnniya ɲini. Nalomanw daa fanin be fatɔyakuma le la.

¹⁵ Ɲanibagatɔ ka tile bɛɛ ye tɔɔrɔ ye. Nga mɔgɔ nisɔndiyanin ta ye ɲanagwɛ ye kudayi.

¹⁶ Ka kɛ fantan ye n'i be siran Masaba ɲa, o ka fisa ka kɛ nafolotigi kamana gwannin ye.

¹⁷ Ka nanfuraburu dama dumu ni kanuya be yen, o ka fisa ni misi tulɔnin ɲimiko ye kɔnɔjuguya la.

¹⁸ Dusutigi be kɛlɛ wili. Nga mɔgɔsabalinin be sɔsɔli ban.

¹⁹ Salabagatɔ ka sira fanin be ŋɔni na. Nga mɔgɔtilennin ta ye siraba labɛnnin ye.

²⁰ Deen hakilitigi b'a faa nisɔndiya. Nga deen naloman t'a bamuso boɲa.

²¹ Nalomanyako le ka di hakilitan ye. Nga hakilitigi kɔni ka sira tilennin lo.

²² Ladilibaga tanya kosɔn, koo be cɛn. Koo be ɲa ladilikɛbaga caaman sababu la.

²³ Jabiɲuman mana bɔ mɔgɔ min daa la, o tigi nisɔn be diya. N'i ka fɔta fɔwaati ɲana, o ka ɲi dɛ!

²⁴ Hakilitigi ka sira ye hɛrɛ sira ye, a te taga n'a ye lahara.

²⁵ Masaba be yɛrɛboɲalaw ka soo ci, nga a be firiyamuso ka yɔrɔ kɔlɔsi.

²⁶ Miirijugu man di Masaba ye. Nga kumaɲuman ka d'a ye.

²⁷ Tɔnɔjugu ɲinibaga be ɲagamini don a ka soo kɔnɔ. Mɔgɔ min te sɔn dasanfɛn ma, o tigi bena sijan sɔrɔ.

²⁸ Mɔgɔtilennin be miiri ka sɔrɔ ka jaabili di. Nga mɔgɔjugu daa be juguman le fɔ.

²⁹ Masaba te gwɛrɛ mɔgɔjugu la, nga a b'a tulo malɔ mɔgɔtilennin daalilikan na.

³⁰ Dusudiyamɔgɔ filɛlikɛcogo be mɔgɔ dusu diya. Kibaru diman mɛnni be barika don mɔgɔ la.

³¹ Mɔgɔ min b'a tulo malɔ ladiliɲuman na, o tigi sigiyɔrɔ be sɔrɔ lɔnnikɛlaw cɛma.

³² Mɔgɔ min be ban ladili la, o tigi mako te a yɛrɛ la. Mɔgɔ min be sɔn ladili ma, o tigi be hakili sɔrɔ.

Masaba ka koo

³³ Ka siran Masaba ɲa, o be lɔnniya di mɔgɔ ma. Yɛrɛmajigi kɔfɛ ye kunkɔrɔta ye.