Zanaw 13 - ALA KA KUMA

¹ Deen hakiliman b'a faa ka fɔta bato. Nga deen tulogwɛlɛn mako te ladili si la.

² Mɔgɔɲuman b'a ka fɔta tɔnɔ sɔrɔ. Nga mɔgɔjugu ta ye fariya ye.

³ Mɔgɔ min b'a daa kɔlɔsi, ale b'a nii kisi. Nga min daa ka bon, ale b'a yɛrɛ le halakira.

⁴ Salabagatɔ ɲaa be bɔ fɛɛn na, a t'a sɔrɔ. Nga baarakɛbaga b'a nigɛlafɛn sɔrɔ.

⁵ Galon ka go mɔgɔtilennin ye. Mɔgɔjugu b'a tɔɲɔgɔn tɔgɔ cɛn k'a maloya.

⁶ Tilenninya be mɔgɔɲuman tanga. Nga kojugu be mɔgɔjugu ta cɛn.

⁷ Dɔ b'a yɛrɛ kɛ fɛntigi ye, k'a sɔrɔ foyi t'a fɛ. Dɔ b'a yɛrɛ kɛ fantan ye, k'a sɔrɔ fɛɛn caaman b'a fɛ.

⁸ Mɔgɔ ka nii sara y'a ka nafolo ye tuma dɔ. Nga fantan te siran ko dɔ ben'a bagabaga.

⁹ Mɔgɔtilennin be manamana i ko yeelen. Mɔgɔjugu be i ko fitinɛ min be fagara.

¹⁰ Yɛrɛboɲa be na ni kɛlɛw ye. Mɔgɔ min be sɔn ladili ma, o ye lɔnnikɛla ye.

¹¹ Nafolo min sɔrɔla joona joona, o bena taga ten fana. Nga min sɔrɔla dɔɔni dɔɔni, o bena caya.

¹² Ni mɔgɔ jigi tigɛra, a dusu be kasi. N'i nigɛlako kɛra i ye, o be sii d'i ma.

¹³ Mɔgɔ min te sɔn kuma ma, o tigi b'a yɛrɛ fili. Min be sɔn mɔgɔ ka fɔta ma, ale bena tɔnɔ sɔrɔ.

¹⁴ Lɔnnikɛla ka ladili be sii di mɔgɔ ma. A be mɔgɔ seen bɔ sayasira kan.

¹⁵ Tɔnɔ be hakilitigiya la. Nga namaramɔgɔ ka sira ka gwɛlɛ.

¹⁶ Yɛrɛkɔlɔsibaga bɛɛ b'u ka kokɛta jati minɛ. Naloman kɔni ka nalomanya be yira kɛnɛ kan.

¹⁷ Cidenjugu be na ni sigɛn ye. Nga cira tilennin fɔbaga be na ni dususuma ye.

¹⁸ Mɔgɔ min be ban ladili la, dɛsɛ ni maloya le y'o ta ye. Mɔgɔ min be ladiliw minɛ, ale be kunkɔrɔta sɔrɔ.

¹⁹ Ni mɔgɔ nigɛlako kɛr'a ye, a dusu be diya. Naloman ka kojugu dabila, o man d'a ye.

²⁰ Mɔgɔ min be taama ni lɔnnikɛla ye, o tigi bena koo lɔn. Nga min be taama ni naloman ye, ale b'a yɛrɛ cɛn le.

²¹ Juguman le be kojugukɛla kɔ. Nga hɛrɛ ye mɔgɔtilennin ka sara ye.

²² Mɔgɔɲuman mamadenw ben'a cɛɛn sɔrɔ. Kojugukɛla ka nafolo maranin be mɔgɔtilennin ye.

²³ Dɛsɛbagatɔw ka forow bena ɲa kosɔbɛ. Nga dɔw be fasa tilenbaliya kosɔn.

²⁴ Mɔgɔ min te sɔn k'a deen bugɔ, a deen koo man d'a ye. Nga min deen koo ka d'a ye, ale kɔni te siga k'a kolo.

²⁵ Mɔgɔtilennin be dumuni kɛ ka fa. Nga mɔgɔjugu kɔnɔ be kasi kɔngɔ bolo.