Zanaw 12 - ALA KA KUMA

¹ Mɔgɔ min be sɔn ladili ma, o tigi be lɔnniya fɛ. Mɔgɔ min be ban ladili la, o tigi ye naloman ye.

² Mɔgɔɲuman koo bena diya Masaba ye. Nga Masaba be miirijugutigi jalaki.

³ Mɔgɔ si te yiriwa juguya barika la. Nga mɔgɔtilennin tena yuguyugu fewu.

⁴ Musoɲuman be i ko masafugulan, a cɛɛ kunna. Nga muso min b'a cɛɛ maloya, ale be i ko jolijugu a fari la.

⁵ Mɔgɔtilennin ka miiriya te foyi ye ni koɲuman tɛ. Mɔgɔjugu ta kɔni te dɔ wɛrɛ ye ni namara tɛ.

⁶ Mɔgɔjugu ka kuma be mɔgɔ faga. Nga mɔgɔtilennin daa be mɔgɔ kisi.

⁷ Ni mɔgɔjugu halakira, foyi te to a kɔ. Nga mɔgɔtilennin ka soo bena to yen kudayi.

⁸ U be mɔgɔ tanu a ka lɔnniya le kama. Nga mɔgɔjugu kɔni be lɛɛbu le.

⁹ Ka kɛ mɔgɔ gwansan ye ka baaraden sɔrɔ, o ka fisa k'i yɛrɛ kɛ mɔgɔbaba ye n'i t'i daladumuni sɔrɔla.

¹⁰ Mɔgɔtilennin be janto a ka begɛnw yɛrɛ la. Nga mɔgɔjugu kɔnɔna ka jugu.

¹¹ Mɔgɔ min b'a ka foro sɛnɛ, o tigi be fa dumuni na. Nga mɔgɔ min be to koo fufafu la, o ye hakilitan ye.

¹² Mɔgɔjugu ɲaa be bɔ namarafɛn fɛ. Nga mɔgɔtilennin ka koo be ɲa.

¹³ Mɔgɔjugu daa b'a yɛrɛ don koo la. Nga mɔgɔtilennin be bɔ kɔnɔgwan na.

¹⁴ Mɔgɔ daa be min fɔ, o nafa b'a fa. A bolo ye baara min kɛ, a ben'o sara sɔrɔ.

¹⁵ Naloman ka miiri la, ko ale ka kɛwaliw ka ɲi. Nga mɔgɔ min be sɔn ladili ma, o tigi ye kolɔnbaga ye.

¹⁶ Naloman b'a ka dimi yira yɔrɔnin kelen. Nga hakilitigi be nɛnili muɲu.

¹⁷ Tiɲɛfɔla be kɛ sababu ye tilenninya be kɛ. Nga seerejugu be kɛ sababu ye namara be kɛ.

¹⁸ Mɔgɔ min be kuma a kunfɛ, a be digi mɔgɔ la i ko murujan. Nga lɔnnikɛla ka kuma be mɔgɔ dusu suma.

¹⁹ Tiɲɛfɔla ka kuma be to kudayi. Nga galontigɛla ta ye ɲatugu ni ɲayɛlɛ ta ye.

²⁰ Mɔgɔ min be miiri kojugukɛ la, namara be o tigi kɔnɔ. Nga mɔgɔ min be ladili di hɛrɛ kosɔn, ale be nisɔndiya.

²¹ Kojugu si tena mɔgɔtilennin sɔrɔ. Nga sigɛn bena mɔgɔjugu labɔ.

²² Galontigɛla koo ka go Masaba ye. Nga tiɲɛfɔla koo ka d'a ye.

²³ Mɔgɔ min b'a yɛrɛ minɛ, o tigi b'a ka lɔnniya dogo. Nga naloman kɔni b'a ka nalomanya yira kɛnɛ kan le.

²⁴ Baara be mɔgɔ kɛ kuntigi ye. Salabagatɔya be mɔgɔ bila jɔnya la.

²⁵ Haminako be mɔgɔ barika ban. Nga kumaɲuman be mɔgɔ nisɔn diya.

²⁶ Mɔgɔtilennin be siraɲuman don a tɔɲɔgɔn seen kɔrɔ. Nga mɔgɔjugu ka sira ye a tunusira le ye.

²⁷ Donsocɛ salabagatɔ te se ka sogo sɔrɔ k'a yiran. Nga mɔgɔ min be baara kɛ, nafa b'o la kosɔbɛ.

²⁸ Mɔgɔ be sii sɔrɔ tilenninyasira le kan. Saya te sɔrɔ o sira nin kan.