Zanaw 11 - ALA KA KUMA

¹ Sumanikɛminan namarata koo ka go Masaba ye. Nga min ka ɲi, o koo ka d'a ye.

² Yɛrɛboɲa be na ni maloya ye. Yɛrɛmajigi be na ni lɔnniya ye.

³ Mɔgɔtilenninw ka ɲumanya bena u bila sira. Nga namaramɔgɔw ka juguya bena u ta cɛn.

⁴ Mɔgɔw kitilon na, nafolo te foyi ɲa. Nga tilenninya be mɔgɔ kisi saya ma.

⁵ Mɔgɔɲuman ka tilenninya b'a taamacogo ɲa. Nga mɔgɔjugu bena halaki a ka juguya kɔnɔ.

⁶ Mɔgɔtilenninw ka tilenninya bena u kisi. Nga namaramɔgɔw bena ben u yɛrɛ ka namaradingɛ kɔnɔ.

⁷ Mɔgɔjugu jigi be kɛ fuu ye a satuma na. A tun y'a jigi min la a ka nafolo kan, o be kɛ fuu ye.

⁸ Mɔgɔtilennin be kisi tɔɔrɔ ma, mɔgɔjugu le b'o tɔɔrɔ sɔrɔ a nɔɔ na.

⁹ Alaɲasiranbali b'a daa kɛ k'a tɔɲɔgɔn ta cɛn. Nga mɔgɔtilenninw bena u yɛrɛ bɔsi lɔnniya barika la.

¹⁰ Dugumɔgɔw be nisɔndiya mɔgɔtilennin ka hɛrɛ kosɔn. Mɔgɔjugu ka saya b'u dusu diya kosɔbɛ.

¹¹ Mɔgɔtilenninw ka duba barika la, u ka dugu be jiidi. Mɔgɔjuguw daa b'a ci.

¹² Mɔgɔ min b'a tɔɲɔgɔn dɔgɔya, o tigi ye hakilitan ye. Nga kolɔnbaga be je le.

¹³ Nafigi be gundo walaka. Nga mɔgɔsɔbɛ b'u mara a dusu la.

¹⁴ Ni ɲamɔgɔ ɲanaman te jamana min kunna, o be nagasi. Ladilikɛbaga caaman be na ni hɛrɛ ye.

¹⁵ Mɔgɔ min b'a daa di a tɔɲɔgɔn ka juru sarako la, o tigi be gwɛlɛya sɔrɔ. Nga min te sɔn k'o kɛ, ale hakili siginin lo.

¹⁶ Musoɲuman be boɲa sɔrɔ. Fangatigiw be nafolo sɔrɔ.

¹⁷ Koɲumankɛbaga b'o kɛ a yɛrɛ le ye. Nga mɔgɔ fariman b'a yɛrɛ ta le cɛn.

¹⁸ Mɔgɔjugu be sara nafabali le sɔrɔ. Nga kotilennin kɛbaga be saraɲuman sɔrɔ.

¹⁹ Tilenninya b'a kɛ mɔgɔ be to sii la. Nga ka boli kojugu kɔ, o be na ni saya ye.

²⁰ Mɔgɔ kɔnɔfinninw koo ka go Masaba ye. Mɔgɔɲuman koo ka d'a ye.

²¹ Sɔbɛ la, mɔgɔjugu ɲagwanbali tena to. Nga mɔgɔtilenninw bena kisi.

²² Ka sanu don lɛɛ nuun na, o ni muso hakilitan cɛɲumanin ye kelen ye.

²³ Mɔgɔtilennin ka miiriya be hɛrɛ le kan. Mɔgɔjugu ta te foyi kɔnɔna, ni Ala ka dimi tɛ.

²⁴ Mɔgɔ min tigɛ foninin lo, o tigi ka nafolo be buguya ka taga. Dɔ b'a tigɛ gwɛlɛya, a tigi ka sɔrɔ be nagasi ka taga.

²⁵ Mɔgɔ min tigɛ foninin lo, o tigi bena nafa caaman sɔrɔ. Mɔgɔ min be jii di minnɔgɔtɔ ma, o tigi yɛrɛ ka minnɔgɔ bena ban.

²⁶ Jama be suman marabagajugu danga ka duba kɛ a feerebaga ye.

²⁷ Koɲumankɛla koo bena diya Ala ye. Kojugukɛla bena juguman sɔrɔ.

²⁸ Mɔgɔ min b'a jigi la a ka nafolo kan, o bena ben. Nga mɔgɔtilennin bena nugu i ko yirifuraburu.

²⁹ Mɔgɔ min b'a ka soo ɲagami, o tigi ta ye fuu ye. Naloman bena kɛ lɔnnikɛla ka jɔɔn ye.

³⁰ Mɔgɔtilennin ka kɛwaliw be sii di mɔgɔ ma. Lɔnnikɛla ka kuma be mɔgɔ hakili yɛlɛma.

³¹ Mɔgɔtilennin b'a ka nafa sɔrɔ dugukolo kan. Mun le bena fɔ mɔgɔjugu ni hakɛkɛlaw ka koo la?