Zaburu 98 - ALA KA KUMA

Aw ka dɔnkilikura la Masaba ye

1 Dɔnkili.

¹ Dɔnkili. Aw ka dɔnkilikura la Masaba ye, bari a ye kabakow kɛ. A ye kisili kɛ a ka sebagaya barika la.

² Masaba y'a yira ko ale ye kisibaga ye. A y'a ka setigiya yira siyaw la.

³ A y'a hakili to a ka ɲumanya, n'a ka kantigiya la Isirayɛlidenw faan fɛ. Diɲɛ danyɔrɔ mɔgɔw bɛɛ y'a ye ko an ka Ala le y'an kisi.

⁴ Diɲɛ mɔgɔw bɛɛ, aw ka Masaba tanu ni nisɔndiya ye. Aw k'a tanu dɔnkili la a ye. An ka nisɔndiyapɛrɛnkan bɔ a ye.

⁵ Aw ka Masaba bato ni gɔni ye. Aw ka dɔnkili la a ye ni gɔni ye.

⁶ Aw ka Masaba tanu ni buru kaan ye. Aw ka Masacɛ, Masaba makiri.

⁷ Kɔgɔji n'a kɔnɔnafɛnw bɛɛ ka mankan kɛ, diɲɛ n'a kɔnɔ mɔgɔw ka mankan kɛ.

⁸ Bajiw ka tɛgɛrɛ fɔ, kuluw bɛɛ lajɛnnin ka nisɔndiya dɔnkiliw la.

⁹ U k'o kɛ Masaba ɲakɔrɔ, bari a be na diɲɛ kiti. A bena diɲɛ kiti ni tilenninya ye, a bena jamanadenw kiti ni tiɲɛ ye.