Zaburu 95 - ALA KA KUMA

Masaba ɲakɔrɔ taabaga ka kuma

¹ Aw ye na an ka nisɔndiyapɛrɛnkan bɔ Masaba ye, an k'an kisikabakuru boɲa.

² An ka ta'a ɲakɔrɔ k'a bato. An k'a tanu ni nisɔndiyadɔnkiliw ye.

³ Masaba ye Ala ye, a ka bon. Masacɛba lo, a be batofɛn bɛɛ kunna.

⁴ Ale lo be diɲɛ bɛɛ kunna k'a ta dingɛbabaw ma ka taga se kulujanjanw ma.

⁵ Ale lo be kɔgɔji ni dugukolo fana kunna. Ale lo y'u dan.

⁶ Aw ye na an ka don ka ɲɔngiri. An k'an kunbiri gwan Masaba kɔrɔ, ale min y'an dan.

⁷ Bari, an ka Ala lo. An ye jama ye min b'a ka mara kɔnɔ. An be i ko sagakulu, a be min mara. N'aw y'a kaan mɛn bii,

⁸ aw kana aw dusu gwɛlɛya i ko a kɛra Meriba cogo min na, i ko min kɛra Masa, kongokolon kɔnɔ.

⁹ Aw faaw ye ne kɔrɔbɔ yen. U ye ne darabɔ, k'a sɔrɔ u tun ye ne ka kɛta ye.

¹⁰ O waati mɔgɔ nunu y'u nigɛ bɔ ne la saan bi naani kɔnɔ. O la, ne y'a fɔ ko: «Jama nin dusu ka gwɛlɛ. U te ne ka koo lɔn.»

¹¹ O la, ne diminin y'a fɔ k'a gwɛlɛya ko: «U tena don n ka lafiɲɛyɔrɔ la.»