Zaburu 92 - ALA KA KUMA

Ala tanu ka ɲi

¹ Lafiɲɛlon dɔnkili dɔ.

² A ka ɲi ka ele Masaba tanu ka dɔnkili la ele Fɛɛn bɛɛ kuntigi ye,

³ k'i ka ɲumanya fɔ sɔgɔmadafɛ, k'i ka kantigiya fɔ sufɛ,

⁴ k'o fɔ ni kolonjo, ani gɔni, ni soku ye.

⁵ Masaba, e ka kɛwaliw be ne nisɔndiya. Ne be nisɔndiyadɔnkili la i ka kɛtaw kosɔn.

⁶ Masaba, e ka kɛtaw ka bon. E ka miiriyaw ka dun kosɔbɛ.

⁷ Naloman te foyi lɔn o la, hakilitan te foyi faamu o la.

⁸ Hali ni mɔgɔjuguw wilila i ko biin, hali ni kojugukɛlaw ka koo yiriwara, u bena halaki pewu!

⁹ Nga, ele min be sanfɛ, i ye Masaba ye kudayi.

¹⁰ Masaba, a filɛ, e juguw be halakira, kojugukɛlaw jɛnsɛnna.

¹¹ I ye kongomisi ka fanga ɲɔgɔn di ne ma. I ye tulukura bɔn n kunna.

¹² Ne ɲaa be n juguw halakitɔ la, ne tulo be mɔgɔjuguw kulekan na.

¹³ Mɔgɔtilenninw be taga ɲa i ko tamarosun, u be boɲana i ko Liban yiribabaw.

¹⁴ U be Masaba ka soo kɔnɔ i ko yiri tutunin. U be wili ka ɲa an ka Ala ka luu kɔnɔ.

¹⁵ Hali n'u kɔrɔla, u be den, jii b'u la kosɔbɛ, u nugunin lo.

¹⁶ O b'a yira ko Masaba tilennin lo. N tangakabakuru lo, tilenbaliya t'a ka koo la.