Zaburu 91 - ALA KA KUMA

Dogoyɔrɔsɔbɛ ye Ala ye

¹ Mɔgɔ min be taga to Fɛɛn bɛɛ kuntigi fɛ k'a yɛrɛ dogo yen, o tigi be lafiɲɛ Setigi ka suma kɔrɔ.

² Ne kɔni be Masaba koo fɔ ko: «N dogoyɔrɔ, n dogoyɔrɔ barikaman lo. Ne ka Ala lo, ne jigi be min kan.»

³ Ale lo b'i bɔsi ka bɔ jaan kɔnɔ, k'i kisi banajugu ka halakili ma.

⁴ A ben'a gaman biri i kan, i bena i yɛrɛ dogo yen i ko sisɛ n'a deenw. A ka tilenninya le ye a ka nigɛkunbɛnnan n'a ka nigɛdeleke ye.

⁵ E tena siran foyi ɲa, hali sufɛ siranyako, walima biɲɛ minw be tɛmɛna tilegwan fɛ.

⁶ Banajugu min be na dibi kɔnɔ, walima fɔɲɔbana min be yɛlɛmayɛlɛma tilefɛ, e tena siran o si ɲa.

⁷ Hali ni mɔgɔ waa kelen sara i gɛrɛfɛ, mɔgɔ waa tan ka sa i kinibolo la, foyi tena e sɔrɔ.

⁸ E kɔni ka filɛli kɛ dɔrɔn, e ben'a ye mɔgɔjugu ka sara bena kɛ min ye.

⁹ Tiɲɛ na, Masaba ye i ka dogoyɔrɔ ye. I ye Fɛɛn bɛɛ kuntigi kɛ i sigiyɔrɔ ye.

¹⁰ Sɛgɛn si tena i sɔrɔ, balawu si tena se i ka sigiyɔrɔ ma.

¹¹ Bari a bena ci di a ka mɛlɛkɛw ma i kosɔn ko u k'u janto i la i ka siraw bɛɛ kan.

¹² U bena i ta u bolo la, janko i seen kana gosi kabakuru la.

¹³ I bena taama jaraw ni saaw, ani sogojuguw cɛma, u tena foyi kɛ i la.

¹⁴ A nɔrɔla ne Masaba la, o la, ne ben'a bɔsi. N ben'a tanga bari a be ne lɔn.

¹⁵ A bena ne daali, ne ben'a jaabi. Ne bena to n'a ye dusukasi tuma na, ne ben'a bɔsi ka boɲa la a kan.

¹⁶ Ne bena sijan d'a ma, ne ben'a kisi.