Zaburu 90 - ALA KA KUMA

Sɛbɛ naaninan ( Dal 90—106 ) Adamaden ye tɛmɛbaga ye

1 Ala ka mɔgɔ Musa ka dɔnkili.

¹ Ala ka mɔgɔ Musa ka dɔnkili. Matigi, ele lo kɛra an dogoyɔrɔ ye waatiw bɛɛ la.

² Sanni kuluw ka dan, sann'i ka diɲɛ dan, i ye Ala ye kudayi.

³ I b'a kɛ adamaden be segi buguri la, i b'a fɔ ko: «Adamaden, kɔsegi yen.»

⁴ Tiɲɛ na, e fɛ, saan waa kelen be i ko kunu tile, walima suu kelen waati dɔ, min be tɛmɛna.

⁵ I b'u furan ka bɔ yen, u be ban i ko siko. U be ban i ko biin.

⁶ Sɔgɔma, a be feeren bɔ k'o yɛrɛkɛ. Wulafɛ, a be fɔnsɔnfɔnsɔn ka ja.

⁷ An be halakira i ka dimi bolo. Tiɲɛ na, i ka dimi ye siranya bila an na kosɔbɛ.

⁸ I ɲaa b'an ka kojuguw la. I b'a kɛ an ka kojugu dogoninw be ye kɛnɛ kan.

⁹ An sii be nagasira i ka dimikojugu fɛ. Ninakili koo kelen, an sii banna.

¹⁰ An sii saan be dan saan bi wolonwula ma, barikatigiw ta ye saan bi seegi. An b'o fana kɛ tɔɔrɔ ni ɲani na. O fana be tɛmɛ joona joona, an be tunu pewu!

¹¹ Jɔn be se k'i ka dimi fariya danyɔrɔ lɔn? Jɔn le b'i ka fariya siranya hakɛ lɔn?

¹² An sii ka surun cogo min na, o yira an na janko an ka kɛ hakilitigiw ye.

¹³ I ka dimi bena ban tuma jumɛn? Masaba, makari i ka baarakɛlaw la.

¹⁴ E ka ɲumanya k'an wasa kabini sɔgɔma. An ka nisɔndiya kosɔbɛ an sii tile bɛɛ la.

¹⁵ I y'a kɛ an ye dɔgɔya sɔrɔ tileda min kɔnɔ, i k'o ɲɔgɔn d'an ma nisɔndiya la. I y'a kɛ an ye sanda min kɛ tɔɔrɔ la, i k'o ɲɔgɔn d'an ma nisɔndiya la.

¹⁶ I ka kɛwaliw yira i ka baarakɛlaw la, u deenw k'i ka sebagaya ye.

¹⁷ Matigi an ka Ala ka ɲumanya ka to an kan. An ka baara ka sabati. Tiɲɛ na, a to an ka baara ka yiriwa.