Zaburu 89 - ALA KA KUMA

Hakilijigiko

¹ Eziraka Etan ka dɔnkili.

² Ne bena Masaba ka koɲuman fɔ dɔnkili la tuma bɛɛ. Ne bena e ka kantigiya fɔ waati nata mɔgɔw ye.

³ Ne ko e ka ɲumanya ye tuma bɛɛ koo ye, e b'i ka kantigiya yira sankolo la.

⁴ Ele Masaba tun y'a fɔ ko i y'i daa di i ka mɔgɔwolomanin ma, ko i y'a fɔ k'a gwɛlɛya i ka baarakɛla Dawuda ye.

⁵ Ko i ben'a kɔmɔgɔw sigi tuma bɛɛ a ka masasigilan kan. Ko i ben'a ka masasigilan sabati waati nata mɔgɔw cɛma.

⁶ Masaba, sankolo b'i tanura i ka kabakow kosɔn. E ka kantigiya fana be fɔra i ka jama cɛma.

⁷ Jɔn le be se k'a yɛrɛ suma ni Masaba ye sanfɛ yɔrɔ la yen? Sankololafɛnw cɛma, jɔn le be i ko Masaba?

⁸ Ala ye siranyafɛn ye sankololafɛnw cɛma. Siranyafɛn lo ka tɛmɛ a laminifɛnw bɛɛ kan.

⁹ Masa Ala, Setigi, jɔn be se i ko ele? E ye kantigi ye koo bɛɛ la.

¹⁰ Ele le be se ka kɔgɔji lamagatɔ mara. N'a be jikuru wili, ele le b'u jigi.

¹¹ Ele lo ye kɔgɔji kɔnɔ fɛnjugu nin nɔɔni k'a kɛ suu ye. E y'i juguw jɛnsɛn i ka setigiya barika la.

¹² Sankolo y'i ta ye, dugukolo fana y'i ta ye. Ele le ye diɲɛ n'a kɔnɔnafɛnw dan.

¹³ Kɔgɔdugu ɲafan ni worodugu be yen ele barika la. Nisɔndiya mankan be kɛ Tabɔri ni Ɛrɛmɔn kulu kan e kosɔn.

¹⁴ Barika b'i bolo la haali, fanga b'i tigɛ la dɛ. E bolo kɔrɔtanin lo sanfɛ.

¹⁵ Tilenninya ni kotilenninkɛ le y'i ka masaya juu sigiyɔrɔ ye. Ɲumanya ni kantigiya be ye i ka kɛtaw bɛɛ la.

¹⁶ Jama min b'i batocogo lɔn, olu dagamuna. Olu bena to yeelen na ele Masaba ɲakɔrɔ.

¹⁷ U bena nisɔndiya loon bɛɛ e barika la. U bena wili e ka tilenninya kosɔn.

¹⁸ Ele le ye an ka kunkɔrɔta sababu an'an ka fanga sɔrɔyɔrɔ ye. E ka ɲumanya barika la, an ye see sɔrɔ.

¹⁹ Ele Masaba le b'an tangabaga woloma. Ele Isirayɛli ka Ala senuman le b'an ka masacɛ sigi.

²⁰ Loon dɔ, i y'i yɛrɛ yira i ka jama na k'a fɔ ko: «Ne ye cɛfari dɔ dɛmɛ, ne ye kanbelen dɔ woloma jama cɛma ka boɲa l'a kan.

²¹ Ne ye n ka baarakɛla Dawuda sɔrɔ. Ne y'a mɔ ni n ka tulu senuman ye.

²² Ne bena ale lo dɛmɛ, ne bena barika don ale lo la.

²³ Jugu tena se ka bali a la, murutibaga tena se a kɔrɔ.

²⁴ Ne ben'a juguw halaki a ɲafɛ, ne ben'a kɔniyabagaw gosi.

²⁵ Ne ben'a to kantigiya la ka koɲuman kɛ a ye. Ne tɔgɔ kosɔn, a bena fanga sɔrɔ a ka masaya la.

²⁶ Ne ben'a kɛ kɔgɔji kuntigi ye, a ka fangatigiya bena se baji ma.

²⁷ Ale bena ne wele ko: ‹N faa, n ka Ala, n kisikabakuru.›

²⁸ Ne ben'a kɛ deen fɔlɔ ye, a bena kɛ dugukolo kan masaw sanfɛ.

²⁹ Ne ka ɲumanya bena to a kan kudayi, foyi tena yɛlɛma n ka layidu nin na.

³⁰ Ne bena to kɔmɔgɔ be sɔrɔ a fɛ tuma bɛɛ, k'a kɛ a ka masaya be to yen kudayi i ko sankolo.

³¹ N'a deenw banna ka ne ka sariya bato, n'u ma taama ka kɛɲɛ ni ne ka fɔtaw ye,

³² n'u ye ne ka kolatigɛninw cɛn, n'u ye ne ka fɔtaw to yen,

³³ ne bena u ɲaa gwan u ka filiw kosɔn, ne bena u sɛgɛn u ka kojugu kosɔn.

³⁴ Nga n tena n ka ɲumanya bɔ u kan, n bena kɛ kantigi ye kudayi.

³⁵ Ne tena n ka bɛɛn cɛn. Kuma min bɔra ne daa la, yɛlɛmani tena kɛ o la.

³⁶ Ne y'o fɔ k'a gwɛlɛya ka ban n yɛrɛ tɔgɔ la, ne tena galon tigɛ Dawuda ye.

³⁷ Kɔmɔgɔ bena sɔrɔ a fɛ kudayi. A ka masasigilan bena to ne ɲakɔrɔ i ko tile.

³⁸ A ka masaya bena sigi ka mɛn i ko kalo, o seere kantigiman be sanfɛ.»

³⁹ Masaba, o bɛɛ n'a ta, i y'a bila, i y'a gwɛn. I dimina i ka mɔgɔ wolomanin kɔrɔ.

⁴⁰ E tun ye layidu min ta i ka baarakɛla ye, i y'o cɛn. I y'a kɛ a ka masafugulan benna duguma.

⁴¹ E y'a ka dugu laminikogo ben, e y'a ka yɔrɔ barikamanw cɛn.

⁴² Tɛmɛbagaw y'a bololafɛnw soɲa, a sigiɲɔgɔnw b'a dɔgɔyara.

⁴³ I y'a kɛ a juguw ye barika sɔrɔ, a kɛlɛbagaw bɛɛ nisɔndiyara.

⁴⁴ I y'a kɛ a ka murujan te foyi ɲana tugu, i m'a dɛmɛ kɛlɛ la.

⁴⁵ I y'a kɛ a ka boɲa tununa, a ka masasigilan benna duguma.

⁴⁶ I y'a kɛ a ka kanbelenya waati ma jaɲa, i y'a maloya kosɔbɛ.

⁴⁷ Masaba, e bena i yɛrɛ yira tuma jumɛn? E ka dimi min ka fari i ko tasuma, o bena ban tuma jumɛn?

⁴⁸ E hakili to ne la, mɔgɔ sako man gwɛlɛ. I ye adamadenw dan janko u ka balo ka tila ka sa.

⁴⁹ Mɔgɔ jumɛn le be yen min te na sa? Jɔn be se k'a nii tanga lahara taga ma?

⁵⁰ Matigi, i ka fɔlɔfɔlɔ koɲuman nunu be min? E tun y'i daa di Dawuda ma koo min na ni kantigiya ye, o be min?

⁵¹ Matigi, u y'i ka baarakɛla dɔgɔya cogo min na, i hakili to o la. I hakili to a la fana ko jama nin kunko be ne le kunna.

⁵² Masaba, i hakili to a la ko e juguw ye n dɔgɔya. U y'i ka mɔgɔwolomanin dɔgɔya a tɛmɛyɔrɔw la.

⁵³ Masaba ka tanu tuma bɛɛ! Amiina yarabi.