Zaburu 88 - ALA KA KUMA

Sigɛnbagatɔ ka daalili

¹ Kore kɔmɔgɔw ka dɔnkili dɔ. Dɔnkililabagaw kuntigi ka dɔnkili. A be la dusukasi tuma na. Eziraka Eman ka dɔnkili dɔ lo.

² Masa Ala, ne kisibaga, ne be kasira e kɔ suu ni tile.

³ E ka ne ka daalikan lamɛn, e tulo malɔ ne fɛ.

⁴ Sɛgɛn ye n labɔ, fɔɔ n be ɲini ka sa.

⁵ Ne be jatira suu ye mɔgɔw fɛ, n kɛra barikatan ye.

⁶ Ne lanin be suuw cɛma. Ne kɛra i ko suu, kaburu kɔnɔ, e hakili te minw la tugu, e te minw dɛmɛna tugu.

⁷ I ye ne fili dingɛ jukɔrɔ. I ye n fili dibi kɔnɔ fɔɔ dingɛ jukɔrɔ.

⁸ I ka dimi sera ne ma, e ye sɛgɛn sifa bɛɛ la ne kan.

⁹ E y'a kɛ ne lɔnbagaw bolila n ɲa. Ne kɛra nidegunfɛn ye u fɛ. Ne kɔni tonin be n ka sigɛn na, bɔyɔrɔ te yen.

¹⁰ Sigɛn ye n ɲaa dibi. Masaba, ne b'i daalila loon bɛɛ, n bolo wilinin be e faan fɛ.

¹¹ Masaba, e bena kabako kɛ suuw ye le wa? Tagabagaw bena wili k'i tanu tugu wa?

¹² K'u to kaburu kɔnɔ, u bena i ka ɲumanya fɔ wa? K'u to dingɛ juguman nin kɔnɔ, u bena i ka kantigiya fɔ yen wa?

¹³ E ka kabakow be lɔn dibi kɔnɔ wa? Mɔgɔ te miiri yɔrɔ min na tugu, e ka tiɲɛkow be ye o yɔrɔ la wa?

¹⁴ Ne kɔni, ne be ele Masaba le daalila, ne dɛmɛ. Sɔgɔmadafɛ n b'i daali.

¹⁵ Masaba, mun na i banna ne la? Mun na e y'i yɛrɛ dogo ne ɲa?

¹⁶ Kabini ne kanbelenman, ne sigɛnnin lo. N sigɛnna fɔɔ ka se saya ma. E ka ɲagwan be n kan, n hakili wilinin lo.

¹⁷ E ka dimi fariya ye ne ta cɛn, e ka siranyakow ye ne halaki.

¹⁸ U be ne laminina loon bɛɛ i ko jii, u be ne datugura faan bɛɛ la.

¹⁹ E y'a kɛ ne teriw ni n taamaɲɔgɔnw bolila. Dibi le kɛra ne taamaɲɔgɔn ye sisan.