Zaburu 83 - ALA KA KUMA

Ala ka jama ka daalili

¹ Azafu ka dɔnkili dɔ.

² Ala, kana to kumabali. E kana je n'i ma dɔ fɔ, e ka dɔ kɛ.

³ A filɛ, i juguw be dɔ kɛra, e kɔniyabagaw be wilila.

⁴ U be janfa sirila i ka jama kama. E be min marala, u be ɲɔgɔnye kɛra o le kama.

⁵ U b'a fɔra ko: «An ka taga u siya tunu, Isirayɛlidenw tɔgɔ kana wele tugu.»

⁶ U be ɲɔgɔnye kɛra, u sɔnna, u bɛnna ele kama.

⁷ Mɔgɔ nunu ye edɔmuw ye, ni Isimayɛli kɔmɔgɔw, ani mowabuw, ni agariw,

⁸ ani gebaliw, ni amoniw, ni amalɛkiw, ani filisiw ni Tirikaw ye.

⁹ Asirikaw yɛrɛ fana farala u kan, u be Lɔti deenw dɛmɛna.

¹⁰ Ala, e tun ye madiyanw kɛ cogo min na, u kɛ ten. E tun ye Sizera ni Yabin kɛ cogo min na Sisɔn kɔɔ daa la, u kɛ ten.

¹¹ U tun halakira Ɛndɔri mara la. U tun kɛra nɔgɔ ye dugukolo kan.

¹² U ka mɔgɔbabaw kɛ Orɛbu ni Zɛbu kɛcogo la, k'u ɲamɔgɔw kɛ Zɛba ni Salimuna kɛcogo la.

¹³ Olu minw tun b'a fɔra ko: «An ka Ala ka sigiyɔrɔ minɛ.»

¹⁴ Ne ka Ala, a to u be munumunu i ko funufunu, i ko fɔɲɔ be taga ni sumanɲaga ye cogo min na.

¹⁵ U jɛni i ko tasuma be tuu kɛ cogo min na, i ko a be kuluyɔrɔ kɛ cogo min na.

¹⁶ Sanfɔɲɔ bila k'u gwɛn ten, fɔɲɔba kɛ ka siranya bila u la.

¹⁷ Maloya bila u la, Masaba, fɔɔ u ka e ɲini le.

¹⁸ U ka maloya, u ka siran tuma bɛɛ. Jigi kana sɔrɔ u fɛ tugu, u ka halaki

¹⁹ fɔɔ u k'a lɔn ko e le tɔgɔ ko Masaba, ko e kelen le ye Fɛɛn bɛɛ kuntigi ye dugukolo kan.