Zaburu 8 - ALA KA KUMA

Ala ka boɲa ni adamaden danbe

¹ Dɔnkililabagaw kuntigi ka dɔnkili. Dawuda ka dɔnkili dɔ. Gatikaw ka gɔni le be fɔ a latuma na.

² Masaba an Matigi, e tɔgɔ ka bon diɲɛ yɔrɔ bɛɛ la! E ka boɲa tɛmɛna sankolo ta kan.

³ E y'i tanuli kuma don denmisɛnw ni denɲɛninw daa la, e y'i juguw ɲa banabiri ten, e y'i jugu farimanw karaba ka je.

⁴ Ni ne ye sankolo ye, min ye i yɛrɛ bolo nɔɔ ye, ani ka kalo ni lolow filɛ, i ye minw dan,

⁵ n b'a fɔ ko: «Mɔgɔ ye mun ye n'i b'i hakili to a la? Adamaden ye mun ye n'i b'i janto a la?

⁶ I y'a kɛ a lɔyɔrɔ ma se i ta ma. I ye nɔɔrɔ ni karama la a kan.

⁷ I y'i ka danfɛnw bɛɛ kuntigiya d'a ma, i ye fɛɛn bɛɛ majigi a ye.

⁸ Saga fara misiw kan, i ye olu bɛɛ d'a ma. Hali kongosogow fana, i ye olu d'a ma.

⁹ I ye kɔnɔw ni kɔgɔji kɔnɔ jigɛw fana d'a ma, ani fɛɛn minw bɛɛ be yaala kɔgɔji kɔnɔ.

¹⁰ Masaba an Matigi, e tɔgɔ ka bon diɲɛ yɔrɔ bɛɛ la!»