Zaburu 78 - ALA KA KUMA

Isirayɛlidenw man kan ka ɲinɛ

1 Azafu ka dɔnkili dɔ.

¹ Azafu ka dɔnkili dɔ. Ne ka jama, aw ka ne ka ladilikan mɛn. Ne be min fɔ, aw k'aw tulo malɔ o la ka ɲa.

² Ne bena kuma talen na, n bena kokɔrɔw fɔ,

³ an ye minw mɛn, ani k'u lɔn, an faaw ye minw fɔ an ye.

⁴ An tena o dogo an deenw na, an bena o fɔ loon nataw mɔgɔw ye. An bena Masaba ka kobabaw, n'a ka sebagaya, an'a ka kabakow fɔ u ye.

⁵ Masaba ye sariya sigi Isirayɛlidenw ye. A y'a ɲini an faaw fɛ k'u ka u deenw kalan n'o ye,

⁶ janko waati nata mɔgɔw k'a lɔn, deen minw bena wolo, olu fana ka wili k'o fɔ u deenw ye.

⁷ N'o kɛra, o deen nunu bena u jigi la Ala kan, u tena ɲinɛ Ala ka kɛtaw kɔ. U ben'a ka fɔtaw bato.

⁸ U tena kɛ u faaw ɲɔgɔn ye. Olu tun kɛra ɲamalɔbaliw ni murutibagaw ye. U jigi tun te yɔrɔ kelen na, u kɔnɔ tun gwɛnin te Ala ye.

⁹ Efarayimu kɔmɔgɔ minw ye kɛlɛden kalatigiw ye, olu bolila ka kɔsegi kɛlɛ loon na.

¹⁰ U tun ma olu ni Ala ka bɛɛn bato, u tun banna k'a ka sariya bato.

¹¹ U tun ɲinɛna Ala ka kɛtaw kɔ, a tun ye kabako minw kɛ u ɲana.

¹² A tun ye kabakow kɛ u faaw ɲana fana, o tun kɛra *Tanisi mara la Ezipiti jamana na.

¹³ A ye kɔgɔji cɛtigɛ, k'a to u tɛmɛna. A y'a kɛ jii lɔra ɲɔgɔn kan i ko kogo.

¹⁴ Tilefɛ, a tun be to ka bila u ɲa sankaba la. Sufɛ, o tun ye tasuma yeelen ye.

¹⁵ A tun ye faraw ci kongokolon kɔnɔ k'a kɛ jii bɔra u kɔnɔ kosɔbɛ.

¹⁶ A y'a kɛ jii bɔra kabakuru kɔnɔ ka woyo, jii bɔra ka woyo ka kɛ baa ye.

¹⁷ Nga u tagara ɲa k'a hakɛ ta. U tun murutira Fɛɛn bɛɛ kuntigi ma kongokolon kɔnɔ.

¹⁸ U tora k'u sagoladumuni ɲini Ala fɛ k'a kɔrɔbɔ.

¹⁹ U tun ye kumajugu fɔ Ala ma ko: «A bena se ka dumuni d'an ma kongokolon nin kɔnɔ wa?

²⁰ Tiɲɛ lo, a ye fara gosi, jii bɔra ka kɛ kɔɔ ye. A bena se ka dumuni ni sogo fana d'an ma wa?»

²¹ Haya! Masaba y'o mɛn, a dimina, o la, tasuma dɔ manana Isirayɛlidenw kan. A dimina u kɔrɔ kosɔbɛ.

²² Bari u tun ma u jigi l'a kan, u tun ma l'a la ko a be se k'u kisi.

²³ K'a sɔrɔ ale lo b'a kɛ sankaba be labɛn, ka kɛ saan be na.

²⁴ A y'a kɛ maanɛ jigira ka kɛ u ka dumuni ye. A ye dumuni di u ma ka bɔ sankolo la.

²⁵ U ye mɛlɛkɛw ka dumuni dumu. A ye dumuni d'u ma min b'u wasa.

²⁶ A y'a kɛ kɔrɔnfɛ fɔɲɔ fiyɛra u sanfɛ. A y'a kɛ fɔɲɔ dɔ cira ka bɔ worodugu faan fɛ a ka setigiya barika la.

²⁷ A y'a kɛ sogo jigira u ye caaman i ko gwangwan. A y'a kɛ kɔnɔw jigira kosɔbɛ i ko kɔgɔji dala cɛncɛn.

²⁸ A y'a kɛ u jigira u ka sigiyɔrɔ la. U jigira u ka fanibuguw lamini na.

²⁹ U ye dumuni kɛ ka fa kosɔbɛ. U tun be min fɛ, Ala y'o kɛ u ye.

³⁰ Nga halibi, u ma wasa, k'a sɔrɔ u daa fanin be.

³¹ Ala dimina u kɔrɔ. A y'u ka fangatigiw faga, a ye Isirayɛli kanbelenw la duguma.

³² Halibi, u tora ka kojugu kɛ, u ma l'a ka kabakow la.

³³ A y'a kɛ u sii be ban fuu, a y'u sii laban jatigɛ kɔnɔ.

³⁴ Saya sera u ma tuma min na, u ye Ala ɲini. U kɔsegira k'a ɲini.

³⁵ U hakili jigira ko Ala y'u tangakabakuru ye, ko Fɛɛn bɛɛ kuntigi Ala le y'u kunmabɔbaga ye.

³⁶ Nga u tun b'a fɛ k'a nigɛ n'u ka kuma ye. U tun be to ka galon le tigɛ a ye.

³⁷ U jigi tun t'a kan sɔbɛ sɔbɛ la. U tun ma kɛ kantigiw ye u ka bɛɛn la.

³⁸ Nga ale ye makaritigi ye. Ale tun be to ka yafa u ma u ka filiw la. A tun te to k'u halaki. A tun be to k'a dusu suma u kɔrɔ, a tun te to k'a ka dimi yira u la.

³⁹ A hakili tun b'a la ko u ye adamadenw dama ye, ninakili be minw na, u be sa, u te segi ka na.

⁴⁰ U murutir'a ma tuma caaman kongokolon kɔnɔ ka don a gasi la o yɔrɔ janin nin na.

⁴¹ U tilara ka Ala darabɔ tugu, u ye Isirayɛli ka Ala dusu kasi.

⁴² U hakili bɔr'a ka sebagayako la. A y'u bɔsi u juguw bolo loon min na, u hakili bɔra o la.

⁴³ A tun ye kabako minw kɛ Tanisi mara la Ezipiti jamana na, u hakili tun t'o la tugu.

⁴⁴ A tun y'a kɛ Ezipiti bajiw yɛlɛmana ka kɛ joli ye. Ezipitikaw tun te se k'o jii min.

⁴⁵ A tun ye limɔgɔ farimanw ci u kama, olu y'u joli min. A tun ye tɔri senjanw ci, olu y'u nii tɔɔrɔ.

⁴⁶ A y'a kɛ tɔɔn y'u ka suman ɲimi, u ka baara tɔnɔ tagara tɔɔn fɛ.

⁴⁷ A y'a kɛ sanbɛrɛ y'u ka *ɛrɛzɛnsunw cɛn, a y'a kɛ u ka torow cɛnna sanbɛrɛ cayakojugu fɛ.

⁴⁸ A y'a kɛ sanbɛrɛ y'u ka begɛnw halaki, a y'a kɛ sanpɛrɛn y'u ka sagakuluw cɛn.

⁴⁹ A y'a ka dimi n'a ka fariya yira u la. A ye cɛnnikɛmɛlɛkɛw ci k'u halaki.

⁵⁰ A dimikojugu fɛ, a ma u tanga saya ma. A ye fɔɲɔbana ci u ma.

⁵¹ A y'a kɛ Ezipitikaw ka deen fɔlɔw sara. A y'a kɛ Kamu kɔmɔgɔw ka deen fɔlɔw sara, u ye minw sɔrɔ u ka barikatigiya tuma na.

⁵² A y'a kɛ a ka jama bɔra ka taga i ko begɛnmisɛnw. A tagara n'u ye kongokolon kɔnɔ i ko sagakulu.

⁵³ A tun y'u bila hɛrɛ sira la, u tun te siranna, kɔgɔji y'u juguw dumu.

⁵⁴ A tagara n'u ye a ka jamana na, a tun ye kulu min sɔrɔ a ka sebagaya la.

⁵⁵ A ye siya wɛrɛw gwɛn ka bɔ u ɲa, k'olu ka yɔrɔw tilan u ye k'o kɛ u niyɔrɔw ye, k'o ka soow d'u ma.

⁵⁶ Nga o bɛɛ n'a ta, an faaw ye Fɛɛn bɛɛ kuntigi Ala darabɔ. U murutir'a ma, u m'a ka fɔtaw bato.

⁵⁷ U kɛra janfaciw ye ka ban i ko u faaw. U kɛra i ko kala min ma ɲi.

⁵⁸ U y'a dusu dimi n'u ka sɔnnikɛyɔrɔw ye. U ka joow sababu la, keliya donn'a la.

⁵⁹ Ala y'o ye minkɛ, a dimina kosɔbɛ, a ye Isirayɛlidenw bila pewu!

⁶⁰ A y'a ka sigiyɔrɔ bila Silo, a tun be sigi fanibugu min kɔnɔ adamadenw cɛma.

⁶¹ A y'a to juguw y'a ka layidu taamasiɲɛ kɛsu ta, min y'a ka sebagaya n'a ka nɔɔrɔ taamasiɲɛ ye.

⁶² A y'a ka jama to murujan ye. A dimina a ka mɔgɔw kɔrɔ kosɔbɛ.

⁶³ Tasuma y'a ka kanbelenw jɛni, furucɛ te sɔrɔ a ka sunguruw ye tugu.

⁶⁴ A ka sarakalasebagaw fagara ni murujan ye, a ka firiyamusow ma kasi.

⁶⁵ Matigi wilila ka bɔ a ka sinɔgɔ la. A bɔra i ko kɛlɛden min ye jagwɛlɛya sɔrɔ duvɛn barika la.

⁶⁶ A y'a juguw bugɔ. A y'u dɔgɔya, dɔgɔya min te ban.

⁶⁷ A ye Yusufu kɔmɔgɔw bila, a ma sɔn ka Efarayimu taw woloma.

⁶⁸ A ye Zuda kɔmɔgɔw le woloma, ani *Siyɔn kulu min koo ka d'a ye.

⁶⁹ A y'a ka sigiyɔrɔ lɔ yen k'a wili. A y'a kɛ i ko dugukolo, a ye min kɛ a ka to yen kudayi.

⁷⁰ A y'a ka baarakɛla Dawuda woloma. A y'a minɛ ka bɔ sagawɛɛrɛ kɔnɔ.

⁷¹ A y'a minɛ ka bɔ a ka sagakulu kɔfɛ k'a kɛ a ka jama Yakuba kɔmɔgɔw dɛndɛbaga ye, k'a kɛ a cɛn Isirayɛli marabaga ye.

⁷² Dawuda y'u mara ni dusuɲuman ye. A y'u mara ni hakilitigiya ye.