Zaburu 75 - ALA KA KUMA

Kiti tigɛbaga ye Ala ye

¹ Dɔnkilibagaw kuntigi ka dɔnkili. Azafu ka dɔnkili dɔ, u ko min ma «Kana cɛnni kɛ.»

² An b'i tanu, Ala, an b'i tanu. I b'an cɛma. An b'i ka kɛta kabakomanw koo fɔ.

³ Ala ko: «Ne mana waati min latigɛ, ne be kiti tigɛ ni tilenninya ye o waati kɔnɔ.

⁴ Dugukolo n'a kan fɛɛnw be yɛrɛyɛrɛ tuma min na, ne le b'a kɛ a juu be sigi ka ɲa.

⁵ Ne ko yɛrɛboɲabagaw ma: ‹Aw kana aw yɛrɛ boɲa tugu.› Ne ko mɔgɔjuguw ma: ‹Aw ka yɛrɛboɲa ser'a daan na.›

⁶ Ne k'u ka yɛrɛboɲa ser'a daan na. K'u kana kungwɛlɛyakuma fɔ.»

⁷ Kunkɔrɔta te koo ye min be bɔ kɔrɔn, walima tileben fɛ, a fana te bɔ kongokolon kɔnɔ.

⁸ Ala le be kiti tigɛ, a be dɔ majigi ka dɔ wɛrɛ kɔrɔta.

⁹ Filen dɔ be Masaba bolo, a fanin be duvɛn fariman na. A ka dimi lo. A b'a di dugukolo kan mɔgɔjuguw bɛɛ ma, olu ben'a min fɔɔ k'a ban pewu.

¹⁰ Ne bena Yakuba ka Ala koo fɔ tuma bɛɛ, ne bena dɔnkili la a ye.

¹¹ A bena mɔgɔjuguw ka yɛrɛboɲa ban, mɔgɔtilenninw bena kunkɔrɔta sɔrɔ.