Zaburu 73 - ALA KA KUMA

Tilanyɔrɔ sabanan ( Dal 73—89 ) Ala ka tilenninya

1 Azafu ka dɔnkili dɔ.

¹ Azafu ka dɔnkili dɔ. Tiɲɛ na, Ala ka ɲi Isirayɛlidenw faan fɛ, a be ten mɔgɔ kɔnɔgwɛw fɛ.

² A tora dɔɔni dɔrɔn, ne seenw tun bena porokoto. A tora dɔɔni dɔrɔn, ne tun bena talon.

³ Bari tuma min na ne ye mɔgɔjuguw ka koo ɲatɔ ye, ne ɲaa tun bɔra o mɔgɔkolon nunu fɛ.

⁴ Gwɛlɛya foyi te sera u ma fɔɔ ka taga se u ka saya ma. U be boɲa, ka tulɔ!

⁵ Mɔgɔ tɔw ka tɔɔrɔ ɲɔgɔn t'u sɔrɔ. U te sigɛnna i ko adamaden tɔw.

⁶ Yɛrɛboɲa le kɛra u ka masirifɛn ye, fariya kɛra u ka delekeba ye.

⁷ Juguya ni miiriyajugu le b'u kɔnɔ.

⁸ U be lɔgɔbɔri kɛ, u be kuma gwɛlɛmanw fɔ, u be dabayakumaw fɔ.

⁹ U be kumajuguw fɔ Ala ma ka dugukolo cɛn n'u ka kuma ye.

¹⁰ O la, mɔgɔw be taga u fɛ k'u ka kuma mɛn i ko jii be min cogo min na.

¹¹ U ko: «Ala be se k'o lɔn cogo di? Fɛɛn bɛɛ kuntigi be se k'o lɔn wa?»

¹² Mɔgɔjuguw be ten le, u be hɛrɛ la tuma bɛɛ, ka to k'u ka nafolo caya.

¹³ Tiɲɛ na, ne ye n yɛrɛ sigɛn gwansan ka to tilenninya la, ka kɛ mɔgɔsɔbɛ ye.

¹⁴ N be sigɛn na loon bɛɛ. Sɔgɔma o sɔgɔma, tɔɔrɔ le be n daa la.

¹⁵ Ni ne ko: «N bena kuma i ko olu,» o be tila ka kɛ i deenw ka siya janfako ye.

¹⁶ Ne miirila o faamuko la, o fana gwɛlɛyara n ma tugu

¹⁷ fɔɔ loon min na, n donna ele Ala ka sigiyɔrɔ la. N ye mɔgɔjuguw ka koo laban cogo faamu yen.

¹⁸ Tiɲɛ na, e b'u bila sira nɔgɔnɔgɔnin kan, i b'a kɛ u be ben jaan kɔnɔ.

¹⁹ A kɛra di? U filɛ, u halakira yɔrɔnin kelen. U ta banna, balawu le y'u laban.

²⁰ Matigi, ni ele wilila dɔrɔn, u ta be ban pewu. A be kɛ i ko siko, i kununtɔ, u tɛmɛtɔ.

²¹ Ne nii tun degunnin lo tuma min na, ne kɔnɔ tun gwanna papapa.

²² Ne tun ye naloman ye, n tun te foyi faamu. Ne tun kɛra i ko begɛn, e ɲakɔrɔ.

²³ O bɛɛ n'a ta, ne tora ni ele ye kudayi, i ye ne bolo minɛ.

²⁴ E be ne mara ka kɛɲɛ n'i ka kolatigɛnin ye, o kɔ, i ben'a kɛ ne be don i ka nɔɔrɔ yɔrɔ la.

²⁵ Mɔgɔ wɛrɛ be n fɛ sankolo kɔnɔ ni ele tɛ wa? Ele kɔ, foyi te ne fɛ dugukolo kan.

²⁶ Ne farikolo be se ka sigɛn, n hakili be se ka ɲagami. Nga Ale lo be fanga di ne ma, ale lo ye ne niyɔrɔ ye tuma bɛɛ.

²⁷ Mɔgɔ minw faranna ka bɔ i la, olu be halaki. Minw murutira, i be olu ta cɛn.

²⁸ Ne ka to ele Ala fɛ, o ye ne ka dagamu ye. Ne ye n jigi la ele Matigi, Masaba le kan janko ka se k'i ka kɛtaw bɛɛ lakali.