Zaburu 71 - ALA KA KUMA

Cɛkɔrɔba ka daalili

¹ Masaba, ne be n yɛrɛ dogo ele le fɛ, kan'a to n be maloya.

² Ne bɔsi ka n hɔrɔnya i ka kantigiya kosɔn. Ne lamɛn ka ne kisi.

³ E ka kɛ kabakuru ye n be dogo yɔrɔ min na, ne be se ka taga yɔrɔ min na ka kisi. Tiɲɛ lo, ele lo ye ne tangakabakuru ni ne dogoyɔrɔ ye.

⁴ Ne ka Ala, ne bɔsi mɔgɔjuguw bolo. Ne bɔsi mɔgɔkolonw ni mɔgɔ nijuguw bolo.

⁵ Matigi, Masaba, ele le ye ne jigi ye. Ne ye n jigi la e kan kabini n kanbelen tuma.

⁶ Ne ye n ka koo bɛɛ la ele le kan kabini n wolotuma, ele fana ye ne mara kabini ne wololon. O la, ne bena to k'i tanu tuma bɛɛ.

⁷ Mɔgɔ caaman tun b'a miiri ko i ye ne ta cɛn, nga e le ye ne dogoyɔrɔ barikaman ye.

⁸ E tanukuma ka to ne daa la dɔrɔn. Loon o loon, ne ka to k'i makiri.

⁹ Ne kɔrɔla sisan, kana ne bila. Hali ni ne barika banna, kana ne fili.

¹⁰ Bari ne juguw be ne koo fɔra, n dɛndɛbagaw be ɲɔgɔn yera.

¹¹ U b'a fɔra ko: «Ala y'a bila. Aw ye tugu a kɔ k'a minɛ. A bɔsibaga te yen.»

¹² Ala, kana e yɔrɔ jaɲa ne la. Na joona ka ne dɛmɛ, ne ka Ala.

¹³ Ne jalakibagaw ka maloya ka halaki. Minw b'a fɛ ka ne mako sa, olu ka dɔgɔya sɔrɔ, u kuun ka surun.

¹⁴ Ne kɔni, ne jigi bena to ele lo kan. Ne bena to k'i tanu kudayi.

¹⁵ Ne bena i ka tilenninya koo fɔ. Ne bena i ka kisili koo fɔ loon bɛɛ. Bari i ka koo te se ka lɔn ka ban.

¹⁶ Matigi, Masaba, ne bena i ka boɲa wango la, bari i ye kobabaw kɛ. Ne bena i ka tilenninya koo fɔ.

¹⁷ Ala, e ye ne kalan kabini n kanbelen tuma. Fɔɔ ka na se bii ma, ne b'i ka koɲumanw fɔ.

¹⁸ Ne kɔni kɔrɔla, n kunsigi gwɛra. Ala, kana ne bila. A to ne k'i ka sebagaya lakali *filankuru nunu ye, k'i ka sebagaya fɔ waati nata mɔgɔw ye.

¹⁹ Ala, e ka tilenninya be fɛɛn bɛɛ sanfɛ, e ye kobabaw kɛ. Ala, jɔn le be i ko ele?

²⁰ Ele lo y'a kɛ sigɛn ni dusukasi ye ne sɔrɔ, ele le bena tila k'a kɛ ne be to lafiya la tugu. E bena kɛ sababu ye ne be bɔ dingɛ kɔnɔ.

²¹ A kɛ ne be n ka kunkɔrɔta sɔrɔ. Ne jigi tugu halibi.

²² Ne bena i tanu ni gɔni ye. N bena o kɛ i ka kantigiya kosɔn, Ala. Ne bena i bato ni kolonjo ye, Isirayɛli ka Ala.

²³ Ne bena e bato ni fɔlikɛminanw ye ka dɔnkili la k'i tanu, bari i ye ne hɔrɔnya.

²⁴ Ne bena e ka kantigiya fɔ loon o loon, bari ne mako sabagaw maloyara fɔɔ u kuun surunna.