Zaburu 65 - ALA KA KUMA

Ala ka kan ni tanuli ye

¹ Dɔnkililabagaw kuntigi ka dɔnkili. Dawuda ka dɔnkili dɔ.

² Ala, e ka kan ni tanuli ye *Siyɔn dugu kɔnɔ. Mɔgɔw ka kan k'u ka dajuruw sara.

³ E min be daaliliw mɛn, adamadenw bɛɛ be na e fɛ,

⁴ n'u ka kojuguw ye. An ka kojugu kunko ka gwili an ma, nga, e b'u yafa.

⁵ Ala, e mana sɔn min ma, ko a ka to e ka soo kɔnɔ, o tigi dagamunin lo. A ka di an ye k'i ka soo kɔnɔ diya bɔ, e batoso senuman diya.

⁶ An kisibaga Ala, e ye kantigi ye. E b'an jaabi ni kɛwali kabakomanw ye, diɲɛ danyɔrɔ mɔgɔw bɛɛ b'u jigi la ele min kan.

⁷ I be kuluw sigi i ka fanga barika la. I ye fangatigi ye.

⁸ I b'a kɛ kɔgɔji be mankan dabila, jikuruw te mankan kɛ tugu, siyaw ka mankan sumana tɔntɔntɔn.

⁹ Dugukolo daan mɔgɔw kabakoyara i ka kabakow kosɔn. I be kɔrɔn ni tileben mɔgɔw nisɔndiya.

¹⁰ I be janto dugukolo la. I b'a sɔn jii la kosɔbɛ, i b'a nafa caya kosɔbɛ. Ala, i ka kɔɔw fanin lo jii la. Ele le be suman ni dugukolo labɛn.

¹¹ I be walanw ɲigi ka ɲa, ka bɔgɔkuruw dakɛɲɛ. I b'u ɲigi ni sanji ye. I be barika don sumanw na, u be falen.

¹² I b'a kɛ saan be yɛlɛma ka ɲa. I tɛmɛyɔrɔ be ɲa kosɔbɛ.

¹³ Kongokolon biin be ɲa kosɔbɛ. Nisɔndiyapɛrɛnkan be bɔra tintinw kan.

¹⁴ Begɛnw fanin be kongo la yɔrɔ bɛɛ, kɔkɛnɛw yɔrɔ kɛra suman ye. I tanuli dɔnkili be mɛnna kongo kɔnɔ yɔrɔ bɛɛ.