Zaburu 63 - ALA KA KUMA

Ala ka ɲumanya ka bon

¹ Dawuda ka dɔnkili dɔ tuma min na a tun be Zuda mara kongokolon kɔnɔ.

² Ala, ele le ye ne ka Ala ye. Ne b'i ɲinina, e koo be n na dɛ. Ne mako b'i la kosɔbɛ i ko dugukolo jalan mako be jii la cogo min na.

³ Ne y'i filɛ i ka sigiyɔrɔ la janko k'i ka sebagaya n'i ka boɲa ye.

⁴ Ka to e ka ɲumanya la, o ka fisa ka to nii na. O la, ne bena e tanu.

⁵ Ne bena i fo n sii bɛɛ la. Ne bena n bolo wili i tɔgɔ kosɔn.

⁶ Ne bena wasa kosɔbɛ. A bena kɛ i ko n ye sogo diman le dumu. Ne bena e tanu ni nisɔndiya ye.

⁷ Ka ne to n ka dilan kan, ni n hakili jigira i la, ne be to ɲana ka miiri i la suu bɛɛ la.

⁸ Ele lo ye ne dɛmɛbaga ye. Ka ne to e gaman kɔrɔ i ko sisɛ n'a deenw, ne be nisɔndiyapɛrɛnkan bɔ.

⁹ Ne be nɔrɔ ele lo la, e ka sebagaya be ne dɛmɛ.

¹⁰ Nga mɔgɔ minw be ne ka saya ɲinina, olu bena jigi dugukolo jukɔrɔ.

¹¹ U bena faga ni murujan ye. U bena kɛ kongowuluw niyɔrɔ ye.

¹² Masacɛ bena nisɔndiya Ala kosɔn. Mɔgɔ minw b'u daa di n'a tɔgɔ ye, olu bena nisɔndiya, bari galontigɛlaw tena se ka foyi fɔ.