Zaburu 62 - ALA KA KUMA

Siranya te yen Ala fɛ

¹ Dɔnkililabagaw kuntigi ni Yedutun ka dɔnkili. Dawuda ka dɔnkili dɔ.

² Ne be ɲamalɔ sɔrɔ Ala kelenpe le fɛ. Ne kisiko be bɔ ale lo fɛ.

³ Ala kelen le ye ne tangakabakuru ni n kisibaga ye. Ne dogoyɔrɔ lo, foyi tena ne sɔrɔ.

⁴ Aw bena jɛn ka to mɔgɔ kelen le kan wa? Aw b'a halakiyɔrɔ le ɲinina, i ko u be jɛn kogo jɛngɛnin kan k'a ci cogo min na, walima luu kogo min be cɛnna.

⁵ U be ɲɔgɔnye kɛ janko k'a bɔ a lɔyɔrɔ la. Galontigɛ le ka d'u ye. U be duba kɛ u daa la dama, k'a sɔrɔ u kɔnɔ fanin be danga na.

⁶ Ne bena n ɲamalɔ Ala kelenpe gɛrɛfɛ, bari ne be jigi sɔrɔ o yɔrɔ la.

⁷ Ala kelen le ye ne tangakabakuru ni ne kisibaga ye. Ne dogoyɔrɔ lo, foyi tena ne sɔrɔ.

⁸ Ne ka kisi ni ne ka kunkɔrɔta be bɔ Ala le fɛ. Ale lo ye ne tangakabakuru ni ne dogoyɔrɔ ye.

⁹ Jama, aw k'aw yɛrɛ kalifa a ma tuma bɛɛ. Aw k'aw ka haminako yira a la, Ala le y'an dogoyɔrɔ ye.

¹⁰ Adamadenw be i ko fɔɲɔ. U be galon tigɛ. U man gwili sumanikɛlan kan, u be i ko fɔɲɔ.

¹¹ Aw kana aw jigi la benkanni kan. Aw kana aw jigi la fɛɛnw kan minw minɛna fanga la. N'aw ka nafolo be jiidira, aw kana o kɛ aw jigi ye.

¹² Ala kumana siɲɛ damani, ne y'o mɛn. A ko ale lo ye Setigi ye.

¹³ Matigi, ele le ye ɲumanyatigi ye. Ele le be mɔgɔ kelen kelen bɛɛ sara ka kɛɲɛ n'u ka kɛtaw ye.