Zaburu 61 - ALA KA KUMA

Ka to Ala ka soo kɔnɔ

¹ Dɔnkililabagaw kuntigi ka dɔnkili. Fɔlikɛminan jurulamanw le be fɔ a latuma na. Dawuda ka dɔnkili dɔ.

² Ala, ne kasikan lamɛn. I tulo malɔ ne ka daalikan na.

³ Ka ne to diɲɛ daan na, ni ne barika dɛsɛra, ne b'i daali. Ne te se ka yɛlɛ fara min kan, e ka taga ni ne ye o yɔrɔ la.

⁴ Bari ele le ye ne dogoyɔrɔ ye. E ye sangaso barikaman ye ne juguw ɲafɛ.

⁵ N b'a fɛ ka to i ka soo kɔnɔ kudayi, ka n yɛrɛ dogo i gaman kɔrɔ i ko sisɛ n'a deenw.

⁶ Ala, ele lo ye ne ka daalili mɛn. E ye niyɔrɔ di e ɲasiranbagaw ma.

⁷ E ka dɔ fara masacɛ sii kan, e ka sijan d'a ma.

⁸ A ka to masaya la i ɲakɔrɔ kudayi. A tanga e ka ɲumanya n'i ka tilenninya barika la.

⁹ O la, ne bena tanuli dɔnkili la i ye tuma bɛɛ, ka to ka n ka dajuruw sara i ye loon o loon.