Zaburu 6 - ALA KA KUMA

Dɛmɛ ɲini, gwɛlɛya tuma na

¹ Dɔnkililabagaw kuntigi ka dɔnkili. Gɔni juru seegi le be fɔ a latuma na. Dawuda ka dɔnkili dɔ.

² Masaba, kana ne jalaki ni dusu ye. I kana ne kolo ni dimi ye fana.

³ Masaba, makari ne la, ne fanga banna. Masaba, ne be yɛrɛyɛrɛla, ne kɛnɛya.

⁴ Ne nii tɔɔrɔnin lo. Masaba, o bena ban waati jumɛn?

⁵ Masaba, kɔsegi ka na ne bɔsi. Ne kisi i ka ɲumanya kosɔn.

⁶ Bari suu hakili te to i la. Jɔn bena i tanu lahara?

⁷ Ne barika banna ŋunankojugu fɛ. Suu o suu ne ka dilan be ɲigi kasi bolo, n ɲaji be n ka dilan bɛɛ ɲigi.

⁸ Dusukasi y'a kɛ n ɲaa fɔnsɔnna. Ne ɲaa te yeli kɛra ka ɲa tugu ne juguw cayakojugu fɛ.

⁹ Aw kojugukɛlaw bɛɛ ka bɔ n kɔrɔ, bari Masaba ye ne kasikan mɛn.

¹⁰ Masaba ye ne daalilikan mɛn, a sɔnna ne ka daalili la.

¹¹ Ne juguw bɛɛ bena maloya fɔɔ ka yɛrɛyɛrɛ. U bena maloya ka kɔsegi joona joona.