Zaburu 58 - ALA KA KUMA

Mɔgɔɲuman ni mɔgɔjugu ka sara

¹ Dɔnkililabagaw kuntigi ka dɔnkili. Dawuda ka dɔnkili dɔ, u ko min ma «Kana cɛnni kɛ.»

² Jamana kuntigiw, mɔgɔ be se k'a jigi la aw kan kiti la wa? N'aw be adamadenw kiti tuma min na, aw b'o kɛ ni tilenninya ye wa?

³ Ayi, kojugukɛ miiriya dɔrɔn le b'aw kɔnɔ. Aw be koo farimanw le kɛra dugukolo kan.

⁴ Mɔgɔjuguw be sirajugu ta kabini u wolotuma. Galontigɛlaw filinin lo kabini u wololon.

⁵ U ka jugu i ko saa ka baga. U te kuma mɛn i ko fɔnfɔnni min b'a tulo gweren

⁶ janko a kana dabaritigi ta mɛn, hali dabaritigi min ka fari kosɔbɛ.

⁷ Ala, e k'u ɲiin kari. Masaba, jara nunu ɲinkalaw kari!

⁸ A to u ka tɛmɛ i ko jii woyotɔ. E ka biɲɛ labɛn k'u halaki.

⁹ U ka kɛ i ko tɔrɔngɔ, min taamatɔ be ja. U ka kɛ i ko deen min sanin wolola, u kana tile ye.

¹⁰ Kala be waati min kɛ ka sɔrɔ ka daga juu wusu, o waati y'a sɔrɔ mɔgɔjugu tununa.

¹¹ Mɔgɔtilenninw bena nisɔndiya, bari Ala y'a mɔnɛ bɔ. U bena u seen ko mɔgɔjuguw joli kɔnɔ.

¹² Mɔgɔ bɛɛ ben'a fɔ ko: «Tiɲɛ na, mɔgɔtilennin ben'a ka sara sɔrɔ. Tiɲɛ na, Ala be yen. Ale lo be kiti tigɛ dugukolo kan.»