Zaburu 57 - ALA KA KUMA

Dɛmɛ ɲini daalili

¹ Dɔnkililabagaw kuntigi ka dɔnkili. Dawuda ka dɔnkili dɔ a bolituma na ka dogo farawo kɔnɔ Sayuli ɲa, u ko min ma «Kana cɛnni kɛ.»

² Makari ne la, Ala, makari ne la. Ne be n yɛrɛ kalifa i ma, ka dogo i gaman kɔrɔ, fɔɔ tɔɔrɔwaati ka tɛmɛ.

³ Ne be kasi Ala Fɛɛn bɛɛ kuntigi kɔ, ale min be ne dɛmɛna.

⁴ Ala bena ne dɛmɛ k'a to sankolo la. A bena ne tɔɔrɔbagaw maloya k'a ka ɲumanya n'a ka tilenninya yira.

⁵ Ne be jaraw cɛma, ne be mɔgɔ farimanw ɲakɔrɔ. U ɲiiw be i ko tamanw ni biɲɛw, u nɛɛnw be i ko murujan dadimanw.

⁶ Ala, e ka boɲa yira sankolo la. A to i ka nɔɔrɔ ka se dugukolo yɔrɔ bɛɛ la.

⁷ U ye jaan la ne ɲa, dusukasi ye ne labɔ. U ye dingɛ sogi ne ɲa, olu yɛrɛ le benna a kɔnɔ.

⁸ Tiɲɛ na Ala, ne jigi b'i kan. Ne bena dɔnkili la k'i tanu.

⁹ Ne bena wili ka gɔni ni kolonjo fɔ. Ne bena kɔn tile ɲa.

¹⁰ Ne bena i tanu jama cɛma, Matigi. Ne bena dɔnkili la e ye siya wɛrɛw cɛma.

¹¹ Bari, e ka ɲumanya ka bon i ko sankolo. E ka tilenninya be se sankaba kɔnɔ.

¹² Ala, e ka boɲa yira sankolo la. A to i ka nɔɔrɔ ka se dugukolo yɔrɔ bɛɛ la.