Zaburu 54 - ALA KA KUMA

Tɔɔrɔbaga dɔ ka daalikan

¹ Dɔnkililabaga kuntigi ka dɔnkili. Fɔlikɛminan jurulamanw le be fɔ a latuma na. Dawuda ka dɔnkili dɔ.

² Dawuda ye dɔnkili nin labɛn tuma min na zifu dɔw nana Sayuli fɛ k'a fɔ a ye ko Dawuda dogonin be olu fɛ.

³ Ala, ne kisi i tɔgɔ kosɔn. I ka fangatigiya yira ka ne ka tiɲɛ fɔ.

⁴ Ala, ne daalikan mɛn. Ne be min fɔra, e tulo malɔ o la.

⁵ Lonanw be wilila ne kama. Mɔgɔfarimanw b'a fɛ ka ne faga. U te miiri Ala koo la fewu.

⁶ Nga ele Ala kɔni bena ne dɛmɛ. E Matigi bena barika don ne la.

⁷ A to juguman ka ne juguw sɔrɔ. A to u be halaki pewu e ka kantigiya kosɔn.

⁸ Ne bena saraka bɔ i ye ni ŋaniyaɲuman ye. Ne bena i tanu bari e ka ɲi.

⁹ Bari e ye ne bɔsi dusukasi bolo. Ne y'a ye ko ne sera n juguw kɔrɔ.