Zaburu 52 - ALA KA KUMA

Nafolotigi ka koo

¹ Dɔnkililabagaw kuntigi ka dɔnkili. Dawuda ka dɔnkili dɔ.

² Edɔmucɛ Dowɛgi tun tagar'a fɔ Sayuli ye ko Dawuda tagara don Ayimelɛki fɛ, Dawuda ye dɔnkili nin la o tuma na le.

³ Cɛŋana, mun na e b'i yɛrɛ boɲa i ka juguya la? E m'a lɔn ko Ala ye ɲumanyatigi ye tuma bɛɛ wa?

⁴ N'i be dɔ farala e ka kojugu kan loon o loon, e nɛɛn be i ko serefe, e be mɔgɔ namara dɔrɔn.

⁵ Kojugu ka d'i ye ka tɛmɛ koɲuman kan. Galon fana ka d'i ye ka tɛmɛ tiɲɛ kan.

⁶ Cɛnnikuma le ka d'i ye. E be koo minw bɛɛ fɔ, o si tilennin tɛ.

⁷ Ala bena e halaki k'i to kudayi, a bena e ta ka taga n'i ye. A bena i bɔ i sigiyɔrɔ la pewu, a bena e bɔ diɲɛ na.

⁸ Mɔgɔtilenninw bena o ye ka siran, ka yɛlɛ e ma k'a fɔ ko:

⁹ «Mɔgɔ min tun banna k'a yɛrɛ kalifa Ala ma, k'a jigi la a ka nafolo kan, aw k'o tigi filɛ sa.»

¹⁰ Ne kɛra i ko olivuyiri nɛrɛnin, Ala ka soo kɔnɔ. Ne jigi be Ala ka ɲumanya banbali le kan.

¹¹ Ne bena i tanu tuma bɛɛ i ka koɲuman kosɔn. E ka ɲi e ɲasiranbagaw faan fɛ, o la, ne be n jigi la e kan.